काठमाडौं । ‘कटर कटरमा’, ‘कलिलो तामालाई’, ‘फूल झरेपनि’ जस्ता दर्जनौँ चर्चित गीतका मूर्धन्य गायिका तारा थापालाई लामो समयपछि प्रत्यक्ष सुन्न पाइने भएको छ । यही असार २१ गते ‘तारा थापा स्वर्णिम साँझ–२०८१’ हुँदैछ । उक्त कार्यक्रममा तारा थापाले आफ्ना लोकप्रिय र कालजयी गीतहरु प्रस्तुत गर्नेछिन् ।
‘कला, साहित्य एवं गीतसंगीतको उत्थान र श्रष्टाको सम्मान हाम्रो अभियान’ भन्ने मूल नाराका साथ लाफा रुंग फाउण्डेशनले क्यान्सर पीडितको सहयोगार्थ कार्यक्रम गर्न लागेको हो । प्रत्यक्ष बाध्यवादनसहित जमलस्थित सांस्कृतिक संस्थान (नाचघर)मा हुने कार्यक्रममा गायिका तारा थापालाई गायक देवराज आले मगर, सागर आले र मनोज थापाले गायन साथ दिनेछन् ।
यस कार्यक्रममा गायिका थापाद्वारा गाइएका केही गीतमा नृत्य पनि प्रस्तुत गरिने आयोजक लाफा रुंग फाउण्डेशनले जनाएको छ । कार्यक्रमबाट संकलन भएको रकम क्यान्सर पीडितलाई सहयोग गरिने जनाइएको छ ।
