काठमाडौं । पत्रकार तथा गीतकार डब्बु क्षेत्रीको शब्दमा गायक नारायण थापाको स्वर रहेको ‘तिमीलाई नै’ गीतको भिडियो सार्वजजनिक भएको छ । यो गीतको भिडियोलाई युट्युवमार्फत सार्वजनिक गरिएको हो ।
यस गीतमा संगीत पनि नारायण थापाले नै गरेका हुन् । सिन्धुलीका नारायण थापा गायकको रुपमा लोकप्रिय भएपनि उनी बेला बेलामा मिठो संगीत सृजनासमेत गर्छन् । यो गीतमा राजेन्द्र बजगाईको संगीत संयोजन छ । जसमा मिक्सिङ तथा मास्टरिङ मनोज परियारले गरेका हुन् । गीतलाई म्युजिक किचनमा रेकर्डिङ गरिएको हो ।
यो गीतको भिडियोमा अभिनेता यसराज गराच र कलाकार तथा मोडल प्रतिक्षा काफ्लेको अभिनय छ । उनीहरु भिडियोमा रोमान्टिक देखिएका छन् ।
यस गीतको भिडियोलाई सर्लाहीको भरतताललगायत विभिन्न रमणीय स्थालमा छायाँकन गरिएको छ । बीरेन्द्र भाट विपिनको सम्पादन, शर्मिला बुढाथोकीको मेकअप, प्रविण सुवेदीको छायाँकन रहेको यस भिडियोलाई कृष्ण रसालले कोरियोग्राफी गरेका हुन् । यस भिडियोमा डब्बु क्षत्रीकै निर्देशन रहेको छ ।
गीतकार डब्बु क्षत्रीका अनुसार गीतमा एक प्रेमीको प्रेमिकाप्रति आसक्ती प्रस्तुत गरिएको छ । जतिबेला पनि आफ्नै प्रेमिकालाई हेरिरहुँ र भेटिरहुँ भन्ने प्रेमीको अथाह प्रेमाशक्तिलाई यो गीतमा उल्लेख गरिएको छ ।
