काठमाडौं । गायिका मेनुका पौडेलले इन्डियन आइडलको मञ्चमार्फत आर्टिफिसियल इन्टेलिजेन्ट (एआई) जडित स्मार्ट भिजन चस्मा पाएकी छन् ।
आइतबार प्रसारण भएको एपिसोडमा उनलाई भारतीय नेत्र चिकित्सक नितिन र रोहनले एआईजडित चस्मा प्रदान गरेका हुन् ।
उक्त चस्मा लगाएपछि मेनुकाले एक्लै हिँडडुल गर्नेदेखि पढ्न र सामुन्ने उभिएको मान्छेलाई चिन्नसम्म सक्ने भएकी छन्।
मेनुकालाई दिइएको चस्मामा क्यामेरा जडान गरिएको छ । क्यामेराले फोटो खिच्ने र सेन्सरले उक्त तस्बिरबारे बताउँछ ।
चस्माको सेन्सरमा एआई जडान गरिएको हुन्छ । सो क्रममा मेनुकाले खुसी हुँदै डाक्टरसहित इन्डियन आइडल टिमलाई धन्यावाद दिइन् ।
‘मलाई जीवनमा यति ठूलो उपहार कसैले दिएको थिएन। जो तपाईंहरुले दिनुभयो। यसका लागि धेरै धेरै धन्यावाद ! मजस्तै अन्य थुप्रै हुनुहुन्छ । जसलाई म मद्दत गर्न सकुँ’, उनले भनिन् ।
प्रभास स्टारर फिल्म सलार को गीत समेत गाइसकेकी मेनुका अहिले इन्डियन आइडलको टप १० मा छिन् । यसै आइडलमार्फत उनी अहिले चर्चामा छिन् ।
