काठमाडौं । भारतीय टेलिभिजन रियालिटी शो ‘इण्डियन आइडल’बाट मेनुका पौडेल बाहिरिएकी छन् । आइतबारको एपिसोडमा उनी प्रतिस्पर्धाबाट बाहिरिएकी हुन् ।
नेपाली चेली मेनुका पौडेल शोको उत्कृष्ट १० मा छनोट हुन सफल भएकी थिइन् । प्रतिस्पर्धाबाट बाहिरिएपछि उनले सामाजिक संजालमा आफ्नो इण्डियन आइडलको यात्रा टुंगिएको जानकारी गराएकी छन् । आफ्नो स्टाटसमा ईन्डियन आइडलको प्रतिस्पर्धाबाट बाहिरिनु आफ्नो समाप्ती नभई सुरुवात भएको उनले बताएकी छन् ।
मेनुकाले लेखेकी छन्, ‘आजबाट इण्डियन आइडलको मेरो यात्रा सकिएको छ । तर मेरो जीवनको सांगीतिक यात्रा भने भर्खर सुरु भएको छ । म पहिलाभन्दा सक्रिय रहेर गायन र प्रस्तुतिमार्फत सबैलाई अझै मनोरञ्जन दिनेछु । ईन्डियन आइडल सिजन १४ को टप १० सम्म पुर्याउन साथ दिनुहुने सबैप्रति आभार व्यक्त गर्न चाहन्छु । यो मेरो सुरुवात हो, समाप्ती होइन । अहिलेको लागी ईन्डियन आइडलबाट बिदा माग्न चाहन्छु ।’
मेनुकाले यो वर्षभरि नै आफ्नो पाइपलाइनमा संगीतको योजना रहेकाले आउने दिनहरूमा पनि आफुलाई यस्तै माया गर्न आग्रह समेत गरेकी छन् ।
