काठमाडौं । ‘घाम जस्तो चम्किलो जुन हुँदैन’ जस्ता दर्जनौँ चर्चित गीतका लोकपिय गीतकार डा. शिव सुवेदीको शब्दमा नयाँ गीत सार्वजनिक भएको छ ।
गीतकार सवेदीकै संगीत सिर्जना रहेको ‘म त तिम्रो हैन’ बोलको गीतलाई अहिलेका चर्चित गायिका शान्तिश्री परियार र गायक कुलेन्द्र विश्वकर्माले गाएका छन् । गीत तथा भिडियो निकै मार्मिक छ । चाहेर पनि एक–अर्काले पाउन नसक्दा भोग्नु परेको एक प्रेमिल जोडीको कथालाई भिडियोमा चित्रण गरिएको छ ।
मौसम हिमालीले निर्देशन गरेको यस गीतको भिडियोमा सनम कायस्थ, ललना चिमरिया र लोमस शर्माले अभिनय गरेका छन् । भिडियोमा तीनै कलाकारको अभिनय शसक्त छ । जसले गर्दा गीतको भावना र मर्मलाई अझ जिवन्त तुल्याएको छ । करण चैसिरले खिचेको यस भिडियोको सम्पादन मनोज कार्कीले गरेका हुन् ।
पेसाले वैज्ञानिक डा. सुवेदीका हालसम्म करिब पाँच दर्जन गीत आइसकेका छन् । उनका ती अधिकांश गीत लोकप्रिय छन् । करिब डेढ दशकअघि नै अत्याधिक मन पराइएको गीतकार सुवेदीको ‘घाम जस्तो चम्किलो जुन हुँदैन’ गीतलाई हालैमात्र नयाँ भर्सनमा आएको छ । जुन गीतले पुनः चर्चा बटुलिरहेको बेला उनले ‘म त तिम्रो हैन’ गीत ल्याएका हुन् । पुष्पाञ्जली म्युजिकको प्रस्तुती रहेको यस गीतलाई पनि दर्शक तथा श्रोताले रुचाएका छन् ।
