काठमाडौं । वरिष्ठ लोक गायक लक्ष्मीप्रसाद (एलपी) जोशीको निधन भएको छ । बिहीवार बेलुका झापाको विर्तामोडस्थित घरम खाना खाएपछि बेहोस भएका उनको उपचारका लागि अस्पताल लैजानेक्रममा बाटोमै निधन भएको हो ।
लामो समयदेखि मधुमेह रोगबाट पीडित जोशीको ८८ वर्षको उमेरमा निधन भएको परिवार स्रोतले जनाएको छ । लोकप्रिय गीत ‘रिटिङ रिटिङ नबजाउ बिनायो, बिनायोले मन मेरो छिनायो’का गायक तथा गीतकार जोशी हुन् ।
२०१३ सालमा रेडियो नेपालमा पहिलो गीत रेकर्ड गराएका उनले २०२२ देखि २०२९ सालसम्म रेडियो नेपालमा जनकवि केशरी धर्मराज थापासँग काम गरेका थिए ।
‘रिटिङ रिटिङ‘ उनको सबैभन्दा हिट गीत हो । ‘वल्लो खोलो हो पल्लो खोलो कमिलाको गोलो’ गीतसमेत चर्चित छ । अन्तिम संस्कार शुक्रबार बिहान ११ बजेपछि झापाको कन्काई माइमा हुने जनाइएको छ ।
