काठमाडौं । गायक तथा संगीतकार ओम सुनार र गायिका अन्नु चौधरीको स्वर रहेको गीत ‘प्रेमकथा’को भिडियो सार्वजनिक भएको छ । भिडियोमा विमल अधिकारी र काजल क्षेत्रीले अभिनय गरेका छन् ।
पछिल्लो समय पाश्र्वसंगीत एवं गायनमा चम्किँदै आएका ओमकै म्युजिक एरेञ्ज रहेको यस गीतलाई शेर साउदले लेखेका हुन् भने संगीत पनि उनले नै गरेका हुन् । ‘प्रेमकथा’ गीतको यो भिडियो पनि फिल्मीशैलीमै निर्माण गरिएको छ ।
अन्नु चौधरी पछिल्लो समयकी चर्चित गायिका हुन् । यो गीतमा ओम र अन्नुको स्वर म्याचिङ छ । त्यसैले युगल गायनको अवसर पाए ओम र अन्नुले पाश्र्व गायनमा बेग्लै स्थान बनाउन सक्ने प्रवल सम्भावना देखिन्छ ।
सोलो गायनमा भने ओम र अन्नु आफैँमा अब्बल मानिछन् । दुवैजना सुगम गायनका लागि चर्चित छन् । तर, युगल गायनमा भने महिला र पुरुषको स्वर म्याचिङ हुनु आवश्यक छ । ‘प्रेमकथा’मा ओम र अन्नुको स्वर सुहाएको छ ।
शेर साउदकै निर्देशन रहेको यस भिडियोलाई राजेश घिमिरेले खिचेका हुन् । ओम शिव फिल्मको प्रोडक्सन रहेको यस भिडियोलाई विकास ज्ञवालीले सम्पादन गरेका हुन् ।
