काठमाडौं । यसपालीको तीजलाई लक्षित थुप्रै गीत आए । नेपाली नारीको महान पर्व तीजलाई लक्षित गर्दै कलाकारले एक महिनाअघिबाटै गीत ल्याउन थालेका हुन् । त्योक्रम अझै जारी छ ।
यस वर्ष आएका दर्जनौँ तीज गीतमध्ये केहीमात्र चर्चामा आएका छन् । तीमध्येको गीत हो– ‘नारीको तीज’ अर्थात ‘लेहेँगा लगाउँछु’ । अभिनेत्री वर्षा राउत अभिनीत यो तीज गीत यतिखेर चर्चामा छ । यस गीतलाई गीतकार डा. शिव सुवेदीले लेखेका हुन् । अर्जुन पोखरेलको संगीत र गायिका कल्पना कुसुमले स्वर दिएको यो गीतलाई श्रोता दर्शकले निक्कै रुचाएका छन् ।
युट्युवको ट्रेण्डिङमा पर्दै यो गीत १६ लाख ५० हजारभन्दा धेरै दर्शकले हेरिसकेका छन् । काजिश श्रेष्ठले निर्देशन गरेको यो भिडियो गीतकार सुबेदीकै अफिसियल युट्युब च्यालन ‘शिव सुवेदी’बाट रिलिज गरिएको हो । डा. सुवेदी लोक तथा दोहोरी क्षेत्रका चर्चित गीतकार हुन् । उनका अधिकांश गीत चर्चित छन् ।
