​पत्नीलाई ‘अलबिदा’ लेखेर हाकिम बेपत्ता

दृष्टि न्यूज

काठमाडौं । लेखनाथ महानगरपालिकाका वरिष्ठ अधिकृत ओमराज पौडेल बेपत्ता भएको साता दिनपछि उनले परिवारको नाममा लेखेको अन्तिम पत्र सार्वजनिक भएको छ । महानरपालिकाले जिल्ला प्रहरीको रोहवरमा पत्र सार्वजनिक गरेको हो ।
पौडेलले घर छाड्नुअघि आफ्नी पत्नीलाई सम्बोधन गरेर एउटा नोट छाडेका थिए । उक्त नोटमा ‘पत्नीलाई खुसी राख्न नसकेको र आगामी दिनमा साथ दिन नसक्ने’ उल्लेख गर्नुका साथै सन्ततीलाई सम्बोधन गरेर ‘तीन फूललाई राम्ररी हेरविचार’ गर्न पत्नीलाई अनुरोध गर्दै ‘अलबिदा’ लेखेको प्रहरीले बताएको छ ।
पत्रमा लेखिएको छ ‘कठै उर्मिला, तिमीले यति धेरै माया दिँदा पनि जीवनभर साथ दिन सकिनँ । ३ वटा कोपिला तिम्रो जिम्मामा छाडेर जाँदैछु । राम्रोसँग बसे चारैजना । अलबिदा ।’
पत्रसँगै पौडेलले आफ्नो मोबाइल, सिक्री र औंठी छाडेका छन् । पौडेलले लेखेको उक्त पत्र कास्की प्रहरी प्रमुख प्रहरी उपरीक्षक ओम रानामगरले पढेर सुनाएका थिए । पौडेलको स्थिति पत्ता लगाउन प्रहरीलगायत सम्पूर्ण संयन्त्र क्रियाशील रहेको जनाउँदै उनले घटनाको विस्तृत अनुसन्धान गरिरहेको जनाए ।
कास्की प्रहरीले पौडेलको खोजी सेती नदी र त्यसको आसपासमा केन्द्रित गरेको छ । पोखराको महेन्द्रपुलबाट एक जना व्यक्ति सेती नदीमा हामफालेको प्रत्यक्षदर्शीले बताएको र घट्नाको प्रकृति र पौडेलले घरमा लेखेर छाडेको नोटका आधारमा सेतीमा हामफालेको आशंकामा सेती नदी वरपर प्रहरीले खोजी केन्द्रित गरेको हो ।

Related News