​किमद्वारा पत्रमार्फत ट्रम्पलाई दोस्रो भेटको प्रस्ताव

दृष्टि न्यूज

वासिंगटन, (एजेन्सी) । अमेरिकी राष्ट्रपति डोनाल्ड ट्रम्पलाई कोरियाली नेता किम जोङ उनले पछिल्लो समय अत्यन्त सकारात्मक पत्र पठाएको अमेरिकी राष्ट्रपतिको कार्यालय, ह्वाइट हाउसले जनाएको छ । उक्त पत्र राष्ट्रपति ट्रम्पले सोमबार प्राप्त गरेका थिए ।
गत जुलाई १२ मा सिंगापुरमा दुई नेताबीच शिखर वार्ता भएको थियो । सो वार्तापछि पुनः दोस्रो भेटघाटको लागि उनले अत्यन्त सकारात्मक पत्र पठाएको ह्वाइट हाउसले जनाएको छ । उक्त पत्र अत्यन्तै गौरव गर्न लायक र सकारात्मक रहेको ह्वाइट हाउसका प्रवक्ता सराह स्यान्डर्स हक्याबीले बताए । उक्त पत्रबाट कोरियाली द्वीपमा प्योङ्याङले निःशस्त्रीकरणको प्रतिबद्धतालाई जारी राखेको भन्ने प्रष्ट गरेको पनि उनको भनाइ छ । 
उत्तर कोरियाली सर्वाेच्च नेता किमले पठाएको पत्रमा पहिलो प्रस्ताव नै अमेरिकी राष्ट्रपति ट्रम्पसँग दोस्रो भेट गर्ने रहेको थियो । सिंगापुरमा भएको पहिलो भेटपछि नै दुई देशबीचको सम्बन्ध सामान्यीकरणतर्फ उन्मुख भएको छ । 
यस पत्रबाट वासिंगटन र प्योङयाङ बीचमा सिंगापुर वार्तापछि थप प्रगतिलाई साबित गर्ने पनि स्यान्डर्सले बताएका छन् । सिंगापुर शिखर बैठकपश्चात उत्तर कोरियाली नेता कीमले आफ्नो देशमा जारी पारमाणविक कार्यक्रम स्थगित गरी निःशस्त्रीकरणतर्फ लाग्ने बाचा गरेको थियो । 
दक्षिण कोरियाली राष्ट्रपति मुन जाए इनले गत जुनमा भएको छलफलपछि ट्रम्प र किमको भेटवार्तामा लगातार प्रयास जारी राख्ने प्रतिज्ञा गरेका थिए । उता कोरियाली प्रायःद्वीपमा पूर्ण रुपमा हुने निःशस्त्रीकरण नै अमेरिका र उत्तर कोरियाबीच समस्या समाधानको आधारभूत कुरा भएको मुनले मंगलबार बताए ।

Related News