आरसिसीको १४औँ बैठकमा के–के भयो निर्णय ?

दृष्टि न्यूज

काठमाडौं । विपद् जोखिम न्यूनीकरणका लागि सेण्डाइ संरचना, दिगो विकास लक्ष्य र जलवायु परिवर्तनसम्बन्धी पेरिस सम्झौताले निर्दिष्ट गरेका मानवीतासम्बन्धी निर्णयहरु कार्यान्वयनका लागि सहकार्यलाई अझ बढाउने निर्णयसहित एशिया प्रशान्त क्षेत्रीय परामर्श समिति (आरसिसी) को १४औँ बैठकको बुधबार सकिएको छ ।
बैठकले प्राकृतिक विपद्बाट बढी प्रभावित रहेका एसिया प्रशान्त क्षेत्रका मुलुकहरुबीच विपद् न्यूनीकरण रणनीतिको कार्यान्वयन, असल अभ्यासहरुको अनुभव आदानप्रदान गरी आगामी दिनमा अझ प्रभावकारीरुपमा पुर्नस्थापन कार्यलाई एकीकृतरुपमा सबलीकरण गर्ने, सदस्य मुलुकका नीति नियमहरुमा त्यसलाई समावेश गर्ने, सहयोगका क्षेत्रहरुलाई बढाउँदै विपद्बाट प्रभावित क्षेत्रमा लगानी वृद्धि गराउन पहल गर्नेलगायतका निर्णयहरु बैठकले गरेको छ । 
गृह मन्त्रालय विपद् व्यवस्थापन महाशाखाका प्रमुख सहसचिव इन्दु घिमिरेले विपद्सम्बन्धी ऐन कानूनको तर्जुमा र प्राकृतिक विपद्पछिको उद्धार कार्यमा नेपाल अन्य एशियाली देशहरुको तुलनामा अगाडि रहेपनि विपद् जोखिम न्यूनीकरणतर्फ भने निकै पछाडि रहेकाले यसतर्फ विभिन्न देशका अनुभव हासिल गर्न बैठक निकै उपयोगी रहेको उल्लेख गरे । 
उनले विपद् जोखिम व्यवस्थापनसम्बन्धी विभिन्न अन्तर्रा्ष्ट्रिय र क्षेत्रीयस्तरका सन्धि सम्झौताहरुमा नेपालले हस्ताक्षर गरिसकेको सन्दर्भमा त्यसलाई कसरी राष्ट्रिय र स्थानीयस्तरमा समावेश गर्न सकिन्छ भन्ने विषयमा पनि बैठकबाट धेरै जानकारी प्राप्त भएको बताए । 
बैठकबाट पारित चार बुँदे निर्णयहरु सुनाउँदै एसियाली पूर्वतयारी केन्द्र (एडिपिसी)का कार्यकारी निर्देशक हान्स गुत्तमनले विपद् जोखिम व्यवस्थापन र न्यूनीकरण तथा जलवायु अनुकूलनसम्बन्धी क्षमता अभिवृद्धिका सम्बन्धमा छलफल हुनुको साथै अनुभव आदानप्रदान गर्न र सहयोगका नयाँ क्षेत्रहरु पहिल्याउन निकै सफल रहेको बताए । 
एडिपिसीका नेपाल प्रतिनिधि मानबहादुर थापाले नेपालमा पहिलोपटक आयोजना भएको यस आरसिसी बैठकमा दिगो विकास र विपद् व्यवस्थापन अनुकूलनबारे छलफल भएको जानकारी दिए । तीन दिनसम्म सञ्चालन भएकोे यस बैठकमा विपद् व्यवस्थापनसम्बन्धी क्षेत्रीय परामर्श समितिका १८ सदस्य राष्ट्रहरुसहित विभिन्न दातृ तथा साझेदार संस्थाहरुबाट १५० जनाको सहभागिता रहेको थियो । 
प्रधानमन्त्री केपी शर्मा ओलीले उद्घाटन गर्नुभएको सो बैठकमा आरसिसी कमिटिका अध्यक्ष मुहम्मद इड्रे (पाकिस्तान)ले नेपाललाई अध्यक्षता हस्तान्तरण गरेका थिए ।

Related News