गाईघाट । देशकै सबैभन्दा ठूलो सरकारी स्वामित्वमा रहेको उदयपुर सिमेन्ट उद्योगका निवर्तमान महाप्रबन्धक तथा नेपाल आयल निगमका कार्यकारी निर्देशक सुरेन्द्रकुमार पौडेललाई उदयपुरमा नागरिक अभिनन्दन गरिएको छ ।
महाप्रबन्धक हुँदा पौडेलले सिमेन्ट उद्योगमा व्यापक सुधार ल्याएर शतप्रतिशत सिमेन्ट उत्पादन गर्न सफल भएको भन्दै बुधबार उदयपुरको जलजले तथा देउरीका स्थानीयवासीले नागरिक अभिनन्दन गरेको जलजलेका समाजसेवी कृष्णप्रसाद पराजुलीले बताउनुभयो ।
यस्तै बुधबार नै पौडेललाई त्रियुगा उद्योग वाणिज्य सङ्घ उदयपुरले समेत भव्य नागरिक अभिनन्दन गरेको थियो । विगतमा धाराशायी भएको उदयपुर सिमेन्ट उद्योगलाई सुधार गरेर अहिले क्षमताभन्दा बढी सिमेन्ट उत्पादन गर्नसक्ने बनाएको भन्दै सङ्घले पौडेललाई नागरिक अभिनन्दन गरेको सङ्घका अध्यक्ष गजेन्द्रकुमार भगतले बताउनुभएको छ ।
जिल्लाका विभिन्न गैरसरकारी सङ्घ संस्था तथा नागरिक समाज गाईघाटले समेत निवर्तमान महाप्रबन्धक पौडेललाई नागरिक अभिनन्दन गरेको उदयपुरका नागरिक अगुवा कृष्णकुमार श्रेष्ठले बताउनुभयो ।
तीन वर्षअघिसम्म आर्थिकरूपमा धाराशायी भएको उदपुर सिमेन्ट उद्योगलाई पौडेल महाप्रबन्धक भएर आएपछि उद्योगको प्राविधिक, भौतिक र प्रशासनिक सुधार गरेपछि अहिले उद्योगले सिमेन्ट उत्पादनमा ठूलो फड्को मारेको नागरिक अगुवा बताउँछन् ।
प्रतिदिन ८०० मेट्रिक टनसम्म सिमेन्ट उत्पादन क्षमता रहेको उदयपुर सिमेन्ट उद्योगमा दुई वर्ष अघिसम्म दैनिक ५५० देखि ६०० मेट्रिक टनसम्म मात्र उत्पादन हुने गरेको थियो । पौडेल महाप्रबन्धक भएर आएपछि उद्योगले दैनिक ७०० देखि ७५० मेट्रिक टन सिमेन्ट उत्पादन गर्दै अहिले दैनिक क्षमता ८०० मेट्रिक टनभन्दा पनि बढी ८५० मेट्रिक टन उत्पादन गर्न थालेको छ ।
दुुई वर्ष अघिसम्म वार्षिक रु २५ करोड घाटामा रहेको उद्योगलाई पौडेलले वार्षिक रु ३५ करोडसम्म नाफामा पु¥याउनु भएको थियो ।
कुशल महाप्रबन्धक भएकै कारण उहाँलाई केही दिनअघि मात्र नेपाल सरकारले नेपाल आयल निगममा कार्यकारी निर्देशकको रूपमा नियुक्त गरिसकेको छ ।
अम्रिसोबाट आम्दानी
त्रियुगा नगरपालिकाको मध्य पहाडी क्षेत्रका साउने खाँबुका कृषकले अहिले बारीमा उत्पादन गरिने अम्रिसोबाट राम्रो आर्थिक आम्दानी गर्दै आएका छन् ।
खाँबु गैरीटोल र डाँडाटोलका कृषकले यस वर्ष प्रत्येक घरले रु २५ हजारदेखि एक लाखसम्मको अम्रिसो बिक्री गरेको कृषक भक्तबहादुर स्माली मगर बताउनुहुन्छ । कुचो तथा झाडुको रूपमा प्रयोग गरिने अम्रिसोको उत्पादन यस वर्ष खाँबुमा राम्रो भएकाले ७५ हजारभन्दा बढीको अम्रिसो बिक्री गरेको खाँबुका अर्का कृषक वीरध्वज मगरले बताउनुभयो ।
गाउँका झण्डै २० घर कृषकले अम्रिसो उत्पादन गर्दै आएको र यस वर्ष गाउँबाट रु दश लाखसम्मको अम्रिसो बिक्री भइसकेको वीरध्वज बताउनुहुन्छ ।
गाउँमा भिरालो जमीन भएको यस क्षेत्रमा सामान्य परिश्रमबाट नै बारीको कान्लामा उत्पादन गर्न सकिने अम्रिसो साउने र खाँबु क्षेत्रमा कृषकले व्यावसायिकरूपमा उत्पादन गर्ने गरेको सम्बन्धित कृषक बताउँछन् । (रासस)
