बाजुरा, ६ माघ । जिल्लाका नौवटै स्थानीय तहमा रहेका ६९ वडामा छाउगोठको तथ्यांक संकलन सुरु गरिएको छ । सामाजिक कुरीति र कुसंस्कारका रुपमा रहेको छाउपडी प्रथालाई अन्त्य गर्न प्रहरीले तथ्यांक संकलन कार्यलाई तीव्रता दिएको प्रहरी नायब उपरीक्षक उद्धवसिंह भाटले जानकारी दिएका छन् ।
अघिल्लो साता बूढीनन्दा नगरपालिका–९ अगाउँपानीमा छाउगोठमा आमासहित दुई छोराको मृत्यु भएपछि प्रहरीले स्थानीय तहको सहकार्यमा गोठको तथ्यांक संकलन गर्न थालेको प्रनाउ भाटले बताए ।
जिल्ला प्रहरी कार्यालय बाजुरा, टाँटे प्रहरीचौकी, इलाका प्रहरी कार्यालय कोल्टी र पिलुचौर प्रहरीचौकी कुन्नाले एकैसाथ छाउगोठको तथ्यांक संकलन कार्यलाई तीव्रता दिएको प्रहरी प्रमुख भाटको भनाइ छ
। प्रहरीले १ भदौमा आएको कानूनको विषयलाई मध्यनजर गर्दै गाउँगाउँमा सचेतनाका कार्यक्रम गर्दै आएको प्रहरी प्रमुख भाटले बताए । जिल्लाको सबैभन्दा बढी त्रिवेणी नगरपालिका–६ पन्धारामा सबैभन्दा बढी गोठ भेटिएको छ ।
जिल्लामा छाउपडी कुप्रथाले जरो गाड्दै गएको छ । छाउ भएको बेला घरभन्दा टाढा राख्ने, दूध दही र गाईगोरुलाई समेत छुन नपाउने प्रथा कायमै रहेको छ । यस्तै जिल्ला प्रशासन कार्यालय बाजुराले पनि आजै नौवटै स्थानीय तहका प्रमुखलाई पनि छाउपडी गोठ हटाउन जिल्लामा निर्वाचित जनप्रतिनिधि र प्रहरीसँग समन्वय गरी छाउगोठ भत्काउन पत्र पठाएको प्रमुख जिल्ला अधिकारी चेतराज बरालले बताए ।
उनले बाजुरा जस्तो विकट क्षेत्रमा छाउपडी कुप्रथाका कारण विभिन्न घटना हुन थालेकाले सचेत नागरिक भएर छाउ भएका महिलालाई घरभित्रै बस्ने वातावरण र छाउगोठ भत्काउन स्थानीय तहलाई समन्वय गर्न पत्र पठाएको प्रमुख जिल्ला अधिकारी बरालको भनाइ रहेको छ । रासस
