तीस वर्षे पञ्चायत निरंकुश तानाशाही व्यवस्था धराशयी हुँदा २०४६ साल चैत २७ गते खुलामञ्चबाट सर्वोच्च नेता गणेशमान सिंहले ‘यो नेपाली जनताको जीत हो’ भन्दा सिंगो जनता जुरुक्कै उठेका थिए ।
त्यही आमसभामा गिरिजाप्रसाद कोइरालाले ‘यो जीत पञ्चको पनि जीत हो’भन्दा कोइरालाको व्यापक विरोध भयो । र, उनी बोल्दा–बोल्दै मञ्चबाट बाहिरिनु पर्यो । कोइरालाप्रतिको आक्रोश शान्त गर्न पद्मरत्न तुलाधरलाई हम्मे–हम्मे पर्यो । नभए कोइराला खुलामञ्चमै धुलो पिठो भइ सक्थे । अहिले ओली त्यही हालतमा पुगेका छन् ।
नेपाली जनता जहिलेपनि प्रतिगमनविरुद्ध उभिएको इतिहास जीवित भएको छ । जनताकै बलले नेपालमा गणतन्त्र स्थापना भयो । जब–जब नेपालमा राजनीतिक संकट आउँछ, तब–तब नेपालको न्यायलय पनि सत्यको पक्षमा उभिएको इतिहास छ । आज सर्वोच्च अदालतले संसद पुनःस्थापनाको पक्षमा गरेको ऐतिहासिक फैसलाले पनि यो कुराको पुष्टि गरेको छ ।
सर्वोच्च अदालत सिंगो नेपाली जनताको आस्था र भरोसाको केन्द्र बनेको छ । यो फैसलाले अदालतप्रतिको आस्था र विश्वासलाई अझ उँचो बनाएको छ । सर्वोच्च अदालतको यो फैसलाले नेपाली जनता सार्वभौम अधिकार सम्पन्न छन् भन्ने कुराको पनि पुष्टि भएको छ । यो फैसला सँगसँगै अब नेपालमा केपी ओली जन्मदैनन् ।
सर्वोच्च अदालत सिंगो नेपाली जनताको आस्था र भरोसाको केन्द्र बनेको छ । यो फैसलाले अदालतप्रतिको आस्था र विश्वासलाई अझ उँचो बनाएको छ । सर्वोच्च अदालतको यो फैसलाले नेपाली जनता सार्वभौम अधिकार सम्पन्न छन् भन्ने कुराको पनि पुष्टि भएको छ । यो फैसला सँगसँगै अब नेपालमा केपी ओली जन्मदैनन् ।
नेपालको संविधान २०७२ ले राजनीतिक स्थायित्वयको सिद्धान्त बोकेको छ । सात सालदेखि नेपाली जनता अहिलेसम्म नेपाल सम्पूर्ण कुराले समृद्ध हुँदाहुँदै पनि नेपाली जनता गरिबी रेखामुनि बाँच्नुपर्ने बाध्यताको मुख्य कारण राजनीतिक अस्थिरता हो । यो अवस्थाबाट नेपाली जनतालाई मुक्त गर्न २०७२ सालको संविधान बनेको हो । तर, दुर्भाग्य ‘लोकतन्त्रबाटै तानाशाह जन्मन्छ’ भनेझै यो संविधानले केपि ओली जन्मायो ।
माओवादीसँग पार्टी एकता गरेपछि दुईतिहाइ बहुमतसहित प्रधानमन्त्री बनेका ओलीले जनताको भावना बुझ्न सकेनन् । ‘मै राज्य हुँ’ भन्ने शैलीमा उनले संविधानको दुरुपयोग गर्न खोजे ।
वास्तवमा उनले गर्न खोजेको कुरा संविधानसम्मत थिएन, हुने कुरा पनि भएन ‘आकाशमा थुकेपछि त्यो थुक आफ्नै मुखमा फर्किन्छ’ भनेर उनलाई सम्झाउने पनि कोही भएनन् । त्यसको परिणाम ३ करोड जनतामा आज उनी एक्लो भएका छन् ।
‘विश्वको इतिहासमा हरेक तानाशाह पतन यसैगरी हुन्छ र लोकतन्त्रलाई जीवन पद्दति बनाउँदै देश अगाडि बढ्छ’ भन्ने कुराको अभ्यासलाई सर्वाेच्चको यो निर्णयाले पुष्टि गरेको छ । प्रधानमन्त्री ओलीले पुस ५ गते चालेको कदमले यो संविधानको उपलब्धि गुम्ने होकि भन्ने चिन्तामा रहेका आम नेपाली सर्वाेच्चको यो फैसलापछि नयाँ अध्यायमा प्रवेश गरेका छन् ।
सर्वोच्चको फैसलाबाट अब संविधानसभाबाट बनेको यो संविधानलाई दुरुपयोग गरेर कुनैपनि निरंकुश, तानाशाह जन्मन सक्ने छैन । सर्वाेच्च अदालतको यो फैसलाले संविधानको रक्षा मात्र गरेको छैन, नेपाली जनताको बलिदानीबाट प्राप्त संघीय लोकतान्त्रिक गणतन्त्रको समेत संरक्षण गरेको छ । यो नै सर्वाेच्च अदालतको फैसलाको मूल मर्म हो ।
