विराटनगर । उद्योगपति एवं समाजसेवी स्व महेन्द्र गोल्छा को नाममा औद्योगिक अध्ययन केन्द्र स्थापना हुने भएको छ । उद्योग सङ्गठन मोरङले उद्योग र विश्वविद्यालयबीचको लिङ्केज अभिवृद्धि गरी आर्थिक विकासका विविध आयाममा अध्ययन अनुसन्धानका विभिन्न कार्यक्रम सञ्चालन गर्ने उद्देश्यले महेन्द्र गोल्छा औद्योगिक अध्ययन केन्द्र सञ्चालनमा ल्याएको छ ।
पूर्वाञ्चल विश्वविद्यालयसँगको सहकार्यमा कार्यान्वयन गरिने यो औद्योगिक अध्ययन केन्द्रलाई मुलुककै आर्थिक एवं औद्योगिक क्षेत्रको नमूना सिकाइ केन्द्रका रुपमा विकास गरिने लक्ष्यका साथ शुक्रबार साँझ उद्योग सङ्गठन मोरङले उद्योग र पूर्वाञ्चल विश्वविद्यालयबीच समझदारी पत्रमा हस्ताक्षर भएको छ ।
हस्ताक्षर कार्यक्रममा उद्योग सङ्गठन मोरङका अध्यक्ष सुयश प्याकुरेलले औद्योगिक क्षेत्रमा अध्ययन अनुसन्धानको माध्यमबाट आर्थिक एवं औद्योगिक क्षेत्रमा प्राज्ञिकविज्ञको ऐकेडेमिक ज्ञानलाई आर्थिक विकासमा उपयोग गर्ने उद्देश्य रहेको बताए । साथै विश्वविद्यालय र उद्योगबीचको प्राज्ञिक एवं व्यावसायिक सम्बन्ध स्थापित गरी अध्ययन अनुसन्धान एवं सिकाइको प्रक्रियालाई अघि बढाउन केन्द्रले भूमिका निर्वाह गर्ने उनले बताए ।
अध्ययन केन्द्रले आर्थिक एवं औद्योगिक क्षेत्रमा प्राज्ञिक अध्ययन अनुसन्धान तथा नीति विश्लेषण गर्न विश्वविद्यालयका युवा अनुसन्धानकर्तालाई प्रेरित गर्ने विश्वास अध्यक्ष प्याकुरेलले व्यक्त गरे ।
पूर्वाञ्चल विश्वविद्यालयका उपकुलपति डा यादवराज कोइरालाले अनुसन्धानको माध्यमबाट उद्योगको समस्या पहिचान गरी नीति निर्माण तहमा सुझाव प्रस्तुत गर्न दुवै पक्षबीच भएको समझदारीले सहयोग पु¥याउने जानकारी दिए । सुदृढ आर्थिक एवं सामाजिक विकासका लागि नव उद्यमशीलतालाई समानान्तररुपमा प्रवद्र्धन गर्दै लैजानुपर्ने धारणा राख्दै उपकुलपति कोइरालाले उद्यमी र प्राज्ञिक वर्गलाई अपनत्व हुने गरी केन्द्रले कार्य गर्ने बताए ।
केन्द्रका संयोजक एवं पूर्वाञ्चल विश्वविद्यालयका डा विजु थपलियाले केन्द्रले उद्योगको नीति निर्माण, नीतिगत बहस र पैरवी, उद्योगी र विश्वविद्यालयबीच अन्तरसंवादको वातावरण तयार गर्न नयाँ आयाम थप्ने धारणा राखे । केन्द्रको संयोजकमा प्राध्यापक डा थपलिया, सहसंयोजकमा इन्द्र खत्री (राजन), सदस्यमा युक्ति गोल्छा, प्राध्यापक देवी भट्टराई, प्रशान्तकुमार लालर तथा सदस्य सचिवमा सङ्गठनका महानिर्देशक चूडामणि भट्टराई रहेका छन ।
