काठमाडौं । संखुवासभाको मादी नगरपालिका १ उम्लिङमा भएको सामुहिक हत्याकाण्डको थप अनुसन्धानका लागि प्रदेश १ प्रहरी कार्यालयबाट अनुसन्धान टोली घट्नास्थलमा पुगेको छ ।
हत्याकाण्डपछि हराइरहेको रञ्जनाको मोबाइल लोकबहादुरको घरबाट बरामद भएपछि थप अनुसन्धानका लागि प्रदेश प्रहरीको टोली संखुवासभा पुगेको हो ।
हत्यामा भाइको संलग्नताबारे अनुसन्धान गर्न प्रहरी टोलीलाई संखुवासभा पठाइएको प्रदेश नम्बर १ का प्रहरी प्रमुख डिआइजी अरुण कुमार बिसीले बताए । हत्याको अनुसन्धान गरी बिराटनगर फर्किएको प्रहरी टोली लोकबहादुरको भाइ नरेश कार्कीको संलग्नताको खोजी गर्दै फेरि संखुवासभा फर्किएको हो ।
भदौ २१ गते बिहान भएको हत्याकाण्डपछि मृतक रञ्जना कार्कीको मोबाइल हराइरहेको थियो । सो दिन बिहान ५ः४४ बजे रञ्जनाको ओप्पो कम्पनीको मोबाइलको स्विच अफ भएको थियो । प्रहरीले उक्त मोबाइलको खोजी गर्ने क्रममा लोकबहादुरका भाइ नरेश कार्कीले उक्त मोबाइल चलाएको पाइएपछि नरेशलाई बुधबार नरेशलाई समेत नियन्त्रणमा लिइएको थियो ।
नरेशले उक्त मोबाइल कहाँबाट कसरी पाए भन्ने सम्बन्धमा थप अनुसन्धान गर्न अनुसन्धान टोली पुनः संखुवासभा फर्किएको हो । यद्यपि हत्याका आरोपी लोकबहादुरले अहिलेसम्म पनि हत्यामा आफ्नो मात्रै संलग्नता रहेको बताइरहेका छन् । तर घटनामा नरेश मतियार पो थिए कि भन्ने पाटोको अनुसन्धान गर्न अनुसन्धान टोलीलाई संखुवासभा पठाइएको डिआइजी बिसीको भनाई छ ।
यसअिघ हत्यामा नरेशको समेत संलग्नता रहेको वा हत्या हुँदै गर्दा नरेशले समेत देखेको समाचार बाहिर आएको थियो । तर प्रहरीले समाचार आएकै दिन विज्ञप्ति निकालेर कोही पक्राउ नपरेको स्पष्टीकरण दिएको थियो ।
प्रदेश प्रहरीका अनुसार पक्राउ परेको लोकबहादुरका भाइ नरेश कार्कीले भने उक्त मोबाइल आफ्नो घरमा भेटिएको बयान दिएकाले मोबाइलका सम्बन्धमा थप अनुसन्धानका लागि टोली पठाइएको हो ।
