प्रधानमन्त्री आज पोखरा जाँदै

काठमाडौं । प्रधानमन्त्री शेरबहादुर देउवा आज पोखरा जाँदैछन् । गण्डकी प्रदेशलाई पूर्ण साक्षर घोषणा गर्ने कार्यक्रमलगायतमा भाग लिन प्रधानमन्त्री देउवा आज पोखरा जान लागेका हुन् ।

देउवा गत असार २९ मा प्रधानमन्त्री भएका थिए । प्रधानमन्त्री भएपछि पहिलोपटक काठमाडौं बाहिरको कार्यक्रममा सहभागी हुन आज देउवा पोखरा जान लागेका हुन् ।

प्रधानमन्त्री देउवाको सचिवालय स्रोतले देउवा आज बिहान पोखरा पुग्ने कार्यक्रम रहेको जनाएको छ ।

नेपाली कांग्रेसका सभापतिसमेत रहेका प्रधानमन्त्री देउवाले आज पोखरामा कांग्रेस कार्यकर्ताहरूसँग भेटघाट गर्ने कार्यक्रम पनि रहेको छ ।

प्रधानमन्त्री देउवा आज पोखरामै बस्ने कार्यक्रम छ भने पोखरामा निर्माणाधीन अन्तर्राष्ट्रिय विमानस्थलको निरीक्षण सोमबार गर्ने कार्यक्रम पनि तय भएको छ ।