जलेश्वर । महोत्तरी जिल्लाको जलेश्वर नगरपालिका–४ सुगा गाउँकी एक महिलालाई बोक्सी भन्दै मलमूत्र खुवाएको आरोपमा दुई महिलासहित चार जनालाई प्रहरीले पक्राउ गरेको छ ।
पक्राउ पर्नेमा स्थानीय सिकिन्दर महतोकी पत्नी पुरनीदेवी, रगेश्वर महतोकी पत्नी प्रमिलादेवीका साथै उनका दुई छोरा सिकिन्दर र अनिल रहेको जिल्ला प्रहरी कार्यालयका प्रहरी उपरीक्षक दिनेशकुमार आचार्यले जानकारी दिए ।
गत बुधबार बिहान स्थानीयवासी शम्भु महतोकी पत्नी सुकमरिया देवी टोलमा घुमिरहेका अवस्थामा सिकिन्दरको घरअगाडि पुग्दा उनकी छोरी १३ वर्षीया काजल रुन थालेपछि चारै जनाले ती महिलाले जादु र टुनामुना लगाएको भन्दै समातेर मलमुत्र खुवाउनाका साथै अपमानजनक व्यवहार गरेका थिए ।
उनीहरुले सुकमरियालाई घर अगाडिको बिजुलीको पोलमा बाँधेर कपाल काटिदिएको, शरीरको कपडा फुकालेर नाङ्गो बनाइदिएको, टाउको र अनुहारमा कालो र सेतो टीका लगाइदिँदै मानव मलमूत्र खुवाएको प्रहरीले जनाएको छ ।
बडादशैं चलिरहेकै बेला उनीहरुलाई पक्राउ गर्नाका साथै घटना स्थलबाट सुकमरियालाई बाँध्न प्रयोग गरेको नाइलनको डोरी, काटेका कपालका टुक्रा र मलमूत्र खुवाउन प्रयोग गरेको प्लाष्टिकको ग्लास तथा बियरको बोतलसमेत बरामद गरिएको थियो । चारै जनालाई हिरासतमा राखी थप अनुसन्धान अगाडि बढाएको प्रहरीले जनाएको छ ।
