काठमाडौं । कोटेश्वरमा टिपरले मोटरसाइकललाई ठक्कर दिँदा एक युवाको मृत्यु भएको छ । मृत्यु हुनेमा २७ वर्षीय प्रकाश लिम्बु रहेको प्रहरीले जनाएको छ ।
मोरङ पथरी घर भएका उनी भक्तपुर सल्लाघारी बस्दै आएका थिए । लिम्बूले चढेको प्रदेश–३–०२६प १८२४ नम्बरको मोटरसाइकलाई मंगलबार राति ११ बजे तीनकुनेबाट कोटेश्वर जाँदै गर्दा ठक्कर दिएको थियो ।
ना १ क ४५०२ नम्बरको टिपरले मोटरसाइकललाई ठक्कर दिँदा लिम्बु सख्त घाइते भएका थिए । उनको उपचारका क्रममा राष्ट्रिय ट्रमा सेन्टरमा मृत्यु भएको महानगरीय प्रहरी परिसर काठमाडौंका प्रवक्ता प्रहरी उपरीक्षक दिनेशराज मैनालीले जानकारी दिए ।
मोटरसाइकलको पछाडि बसेका काभ्रेका ३१ वर्षीय देव लामा दुर्घटनामा गम्भीर घाइते रहेको मैनालीले बताए । उनको ट्रमा सेन्टरमा उपचार भइरहेको छ ।
