काठमाडौं । ईलाम, रोङ गाउँपालिका–४ जोरकलशबाट करिब १ ग्राम २ सय मिलिग्राम चरेस जस्तो देखिने पदार्थ र ८९ ग्राम गाँजासहित सुनसरी बराहक्षेत्र नगरपालिका–१ चियाबारी बस्ने ३५ वर्षीय राज कुमार राईलाई शनिबार दिउँसो प्रहरीले पक्राउ गरेको छ ।
प्रहरी चौकी किटेनीबाट खटिएको प्रहरीले पैदलयात्री राईलाई जाँच गर्ने क्रममा उक्त परिमाणको लागूऔषध सहित फेला पारी पक्राउ गरेको हो ।
यस्तै, कास्की, पोखरा महानगरपालिका–१ सिमपानीबाट १ केजी अवैध लागूऔषध गाँजा सहित सोही ठाउँ बस्ने ४२ वर्षीय बिष्णु गौचनलाई शनिबार साँझ प्रहरीले पक्राउ गरेको छ ।
विशेष सूचनाको आधारमा वडा प्रहरी कार्यालय बगरबाट खटिएको प्रहरीले गौचनको कोठामा तलासी गर्ने क्रममा उक्त परिमाणको लागूऔषध फेला पारी उनलाई पक्राउ गरिएको प्रहरीले जनाएको छ ।
यस्तै, सर्लाही, हरिवन नगरपालिका–८ पुरानो बजारबाट करिब ५ केजी अवैध लागूऔषध गाँजा सहित २ जनालाई शनिबार राति प्रहरीले पक्राउ गरेको छ । पक्राउ पर्नेहरुमा बागमती नगरपालिका–१२ बस्ने ३८ वर्षीय रुद्र बहादुर अधिकारी र उनकै श्रीमती ३० वर्षीया रिचा अधिकारी रहेका छन् ।
बा.६८ प ४९७२ नम्बरको मोटरसाइकललाई ईलाका प्रहरी कार्यालय हरिवनबाट खटिएको प्रहरीले जाँच गर्ने क्रममा मोटरसाइकलमा सवार उनीहरुलाई उक्त परिमाणको लागूऔषधसहित फेला पारी पक्राउ गरिएको प्रहरीले जनाएको छ । यस सम्बन्धमा प्रहरीले थप अनुसन्धान गरिरहेको जनाएको छ ।
