काठमाडौं । रोकिराखेको ट्रकमा कार ठोक्किंदा रुपन्देहीको बुटवलमा ३ जनाको मृत्यु भएको छ । रुपन्देहीको बुटवल तामनगरमा सडकमा रोकिराखेको ट्रकमा कार ठोक्किंदा कारमा सवार तीन जनाको मृत्यु भएको हो ।
दुर्घटनामा कारमा सवार २ जना गम्भीर घाइते भएका छ्न् । प्रहरीका अनुसार बुटवल उपमहानगरपालिका वडा नं. १२ तामनगर नजिक पूर्वपश्चिम राजमार्गमा रोकिराखेको लु २ ख ९७७२ नम्बरको ट्रकमा लु ३ च ४४४२ नम्बरको कार सोमबार बिहानै ठोक्किएको हो ।
प्रहरीले दुर्घटनामा एक जनाको घटनास्थलमै र दुई जनाको उपचारको क्रममा अस्पतालमा मृत्यु भएको जनाएको छ । घाइतेहरूको लुम्बिनी प्रादेशिक अस्पताल बुटवलमा उपचार भइरहेको छ ।
इलाका प्रहरी कार्यालय बुटवलले जनाए अनुसार मृतक र घाइतेको सनाखत हुन बाँकी रहेको छ । यस्तै बेहुलाबेहुलीलाई कपिलवस्तु छोडेर फर्किंदै गरेको कार सडक किनारमा रोकिराखेको पराल बोकेको ट्रकको पछाडि ठोक्किएको हो ।
कारको अगाडिको भाग क्षतिग्रस्त भएको छ । उक्त कारलाई क्रेनको सहायताले सडकबाट हटाइएको छ ।
