पोखरा । जिल्ला प्रहरी कार्यालय, कास्कीको हाता भित्र निर्माण गरिएको पुस्तकालय सहितको लाईब्रेरी क्याफेको उद्घाटन भएको छ । प्रहरीलाई पठनपाठनमा प्रोत्साहित गर्न यस्तो क्याफे बनेको हो ।
गण्डकी विश्व विद्यालयका डीन डा.कपिन अधिकारी, पि.एन. क्याम्पस नेपाली विभाग प्रमुख प्रा. डा. कुशुमाकर न्यौपाने पि.एन. क्याम्पसका क्याम्पस प्रमुख डा.सरोज कोइराला, कास्की जिल्लाका प्रमुख जिल्ला अधिकारी जयनारायण आचार्य, गण्डकी प्रदेश प्रहरी कार्यालय पोखराका निमित्त प्रमुख एसएसपी. कृष्ण हरी शर्मा, जिल्ला सुरक्षा समिति कास्कीका पदाधिकारी, मानव अधिकार कर्मी, पत्रकार लगायतको उपस्थितिमा लाईब्रेरी क्याफेमा उद्घाटन गरिएको छ ।
जिल्ला प्रहरी कार्यालय, कास्कीका एसपी रमेश थापाको योजनाअनुसार यस्तो क्याफे बनेको हो । उनी जून कार्यालयमा जान्छन्, त्यहाँ केही न केही सिर्जनशील काम गर्दे आएका छन् । कास्कीमै उनले लागुऔषधमा पक्राउ परेका गायक लाहुरेलाई छुटेपछि लागुऔषधविरुद्धको सचेतनादूत बनाएर खटाएका थिए । यसअघि गोरखा जिल्लामा कार्यरत रहँदा पनि उनले प्रहरी कार्यालयमा लाइब्रेरी बनाएका थिए ।
