पाँचथर । शुक्रबार राति पहिरोले घर बगाउँदा बेपत्ता भएका पाँचथरको फालेलुङ गाउँपालिका–७ का दुई जनाको शव ३७ घण्टापछि फेला परेको छ ।
पहिरोले घर बगाउँदा फालेलुङ–७ बिहीदिनका रुपलाल मगरको परिवारका तीन जना बेपत्ता भएका थिए । ४२ वर्षीय रुपलालको शव शनिबार बिहान फेला परेको थियो ।
रुपलालकी श्रीमती ३८ वर्षीया गोमा र भतिजी १९ वर्षीया एलिसाको शव आज बिहान फेला परेको पाँचथरका प्रहरी नायब उपरीक्षक राकेश थापाले जानकारी दिए । स्काभेटरको सहायताले पहिरोमा पुरिएर मृत्यु भएका तीनै जनाको शव निकालिएको हो ।
पहिरो जाँदा घरमै रहेका उनका काका दलप्रसाद मगर भने उच्छिटिएर बाँच्न सफल भएका थिए । सडक निर्माण समयमा नहुँदा पहिरो गएको स्थानीयको भनाइ छ ।