काठमाडौँ । नेपाली कांग्रेसका बौद्धिक नेता, समाजवादी चिन्तक एवं प्रतिनिधिसभा सदस्य प्रदीप गिरीको शनिबार राति भएको निधनले सबैलाई दुखित र मर्माहत बनाएको छ भने देशले एक सच्चा र असल नेता गुमाएको छ । लामो समयदेखि घाँटीको क्यान्सरबाट पीडित गिरीको उपचारकै क्रममा हिजो राति ९.३० बजे ललितपुरको नेपाल मेडिसिटी अस्पतालमा निधन भएको थियो ।
उनको निधनको खबरलाई राजधानीलगायत मोफसलबाट आज प्रकाशित प्रायः सम्पूर्ण पत्रपत्रिकाले पहिलो पृष्ठमा प्रमुख समाचारको रुपमा प्रकाशन गरेका छन् भने रेडियो, टेलिभिजनलगायतका सञ्चारमाध्यमले हिजो बेलुका नै समाचार सम्प्रेषण गरेका थिए । प्रायः सबैजसो अनलाइन पोर्टलहरुमा उनको निधनपछि राजनीतिकलगायत विभिन्न व्यक्तित्वहरुका विचार प्रकाशित छन् भने सामाजिक सञ्जालहरुमा पनि उनको निधनप्रति गहिरो शोक व्यक्त गर्दै राजनीतिमा उनले देखाएका निष्ठाका विषयलाई उच्च महत्वका साथ विचार व्यक्त गरिएका छन् ।
गोरखापत्र राष्ट्रिय दैनिकले पहिलो पृष्ठमा नेता गिरीको निधन शिर्षकको समाचारमा उनको राजनीतिक जीवन यात्राको प्रसङ्ग उल्लेख गर्दै २०१७ सालदेखि नै राजनीतिमा होमिनु भएको, विभिन्न समयमा गरी चार वर्ष जेल परेका, २०२४ सालमा भारतको वनारसमा रहँदा नेपाल छात्र सङ्घको उपाध्यक्ष हुँदै राजनीति अघि बढाएका, नेपाली कँँग्रेसको महाधिवेशनबाट पटकपटक अत्याधिक मत ल्याई केन्द्रीस्य सदस्य निर्वाचित बनेको विवरण समेटेको छ ।
उनले भारतको जवाहरलाल नेहरू विश्वविद्यालयबाट दर्शनशास्त्र र अर्थशास्त्रमा स्नातकोत्तर गरेका थिए । आदर्श र निष्ठावान राजनीतिको पर्याय रहेका उनले कहिल्यै मन्त्री पदको लालसा नराखेक तथा राज्य पुर्नसंरचना र लोकतान्त्रिक व्यवस्था सुदृढीकरणका लागि देखाएका बाटोमा हिँड्नुपर्ने विषयमा कांग्रेस केन्द्रीय सदस्य प्रतिमा गौतमको विचारलाई समावेश गरेको छ ।
कान्तिपुर राष्ट्रिय दैनिकले पनि नेता गिरीको निधनको समाचार पहिलो पृष्ठमा दीप बालेर गए प्रदीप शिर्षकमा स्केचसहितको तस्बिर प्रकाशित गरेको छ । अध्ययनमा अद्भुत, विचारमा विलक्षण र प्रस्तुतिमा प्रस्ट गिरीले अग्रजभन्दा सधैं युवातर्फ हेरे, सत्ता, समाज र व्यवस्था मात्र होइन, दलभित्र पनि निरन्तर प्रतिपक्षी आवाज बन्न ऊर्जा सञ्चार गरिरहेको प्रसङ्गलाई समाचारमा उल्लेख गरेको छ ।
समाचारमा नेपालका सबैजसो राजनीतिक आन्दोलनमा सहभागी उनी कांग्रेसका संस्थापक नेता बीपी कोइरालाका सहयात्रीसमेत हुनुभएको र बनारसमा छात्र सङ्घमा चुनाव लड्दादेखि नै गिरीले बीपीको सङ्गत पाएका थिए । अध्ययन, अनुसन्धान र लेखनमा रुचि राख्ने उनले लेखेका लेनिनको जीवनी, नारी, माक्र्सवाद र अर्थशास्त्रलगायत विषयमा एक दर्जनभन्दा बढी पुस्तक प्रकाशित छन् ।
पार्टीमा समावेशीकरणका पक्षधर गिरीले नयाँ कार्यक्रम प्रस्तुत गरे, जसलाई ‘जमदम’ अर्थात ज भनेको जनजाति, म भनेको महिला, द भनेको दलित र म भनेको मधेसी रहेको विषय समाचारमा पढ्न पाइन्छ ।
समाचारमा प्रधानमन्त्री एवं नेपाली कांग्रेसका सभापति शेरबहादुर देउवा, वरिष्ठ नेता रामचन्द्र पौडेल, शेखर कोइराला, एमाले नेता घनश्याम भुसाल र माओवादी नेता राम कार्कीलगायत विभिन्न सहकर्मीका संक्षिप्त विचार पनि समावेश गरिएको छ ।
प्रधानमन्त्रीले नेता गिरीको बारेमा वैचारिक र समाजवादी चिन्तक गिरीजीको निधनको खबरले आफू स्तब्ध रहेको र देशले एक सच्चा र असल नेता गुमाएको बताएका छन् । नेता पौडेलले पदको लोभ नराखी विचारको राजनीति गरेका, कांग्रेसलाई प्रेरणा दिएको बताउँदै उनको निधनले यो अभाव कांग्रेसले पूर्ति गर्न नसक्ने धारणा राखेका छन् ।
त्यस्तै नेता कोइरालाले समाजवादी चिन्तक प्रदीप दाइले पु¥याएको योगदानको जति नै चर्चा गरेपनि अधुरै रहने बताएका छन् । एमाले नेता भुसालले हाम्रो समयको अविश्रान्त समाजवादी कमरेड प्रदीप गिरी हाम्रो यात्राभरि तपाइँलाई सम्झिरहने छौँ भनेका छन् भने माओवादी नेता कार्कीले माक्र्सवादको जन्म तथा विकासको पात्र, प्रवृत्ति र परिवेशलाई आलोकित पार्न सदा प्रयन्तशील गिरी भोकाहरुबीच बाँचीरहने छन् भनेका छन् ।
सोही पत्रिकाले उनको जन्मथलो सिराहाको डेटलाइनमा आश्रममा सन्नाटा शिर्षकमा पृष्ठ ११ मा अर्को समाचार प्रकाशित गरेको छ । समाचारसँगै लहानस्थित उहाँको निवास र त्यहाँभन्दा पाँच किमी पर रहेको आश्रमको प्रतीक्षालयको तस्बिर पनि समावेश छ । भारतका जयप्रकाश नारायणले जस्तै कर्मप्रधान आश्रम बनाउने परिकल्पनाअनुसार उनले २०४८/४९ सालतिर आफैँले विरुवा रोपेर आश्रम स्थापना गरेका थिए ।
राजधानीबाटै प्रकाशित हुने अर्को राष्ट्रिय दैनिक अन्नपूर्णले आजको पहिलो पृष्ठमा समाजवादी चिन्तक गिरीको अवसान शिर्षकमा समाचार प्रकाशित गरेको छ । तस्बिरसहित प्रकाशित समाचारमा नेता गिरीको निधनप्रति पार्टी सभापति देउवालगायत विभिन्न नेताहरुले व्यक्त गर्नुभएको श्रद्धाञ्जलिका शब्दहरु तथा उहाँले राजनीतिमा खेल्नुभएको भूमिकाको चर्चा गरिएको छ ।
नयाँपत्रिका दैनिकले पनि अस्ताए समाजवादी चिन्तक शिर्षकमा उनको स्केचसहितको तस्बिरसहित पहिलो पृष्ठमा समाचार प्रकाशित गरेको छ । समाचारमा समाजवादी चिन्तकका रुपमा परिचित प्रदीप गिरी चार दशकभन्दा लामो समयदेखि कांग्रेस राजनीतिमा सक्रिय रहेका विषयदेखि उनको राजनीतिक योगदानको बारेमा विभिन्न राजनेताहरुले व्यक्त गरेका धारणाहरु समावेश गरिएको छ ।
यसैगरी नागरिक राष्ट्रिय दैनिकको पनि पहिलो पृष्ठमा समाजवादी चिन्तक गिरीको निधन शिर्षकमा प्रकाशित समाचारमा लामो समयदेखि भारतमा उपचार गराएर स्वदेश फर्केलगत्तै स्वास्थ्यमा सुधार नआएपछि मेडिसिटी अस्पतालमा उपचाररत रहनु भएको विषयदेखि राजनीतिमा प्रवेशसँगै सक्रिय भूमिका निर्वाह गर्नुभएको प्रसङ्गलाई समावेश गरेको छ । हिमालय टाइम्स दैनिकको पहिलो पृष्ठमा नेता गिरीको निधन शिर्षकमा उहाँको निधनसँगै नेपालले एउटा वौद्धिक राजनीतिक व्यक्तित्व गुमाएको प्रसङ्ग उल्लेख छ । महात्मा गान्धीको अनुयायी गिरी नेपालमा माक्र्सवादको राम्रो व्याख्या गर्न सक्ने व्यक्तिमा पर्नुहुन्थ्यो भनिएको छ ।
यसैगरी अङ्ग्रेजी राष्ट्रिय दैनिक पत्रिका दि राइजिङ नेपालको पहिलो पृष्ठमा नेता प्रदीप गिरीको निधन शिर्षकमा तस्बिरसहितको समाचार प्रकाशित छ । उनको निधनमा राष्ट्रपति विद्यादेवी भण्डारी र प्रधानमन्त्री देउवाले दिनुभएको शोक वक्तव्य समावेश गरिएको छ । यस्तै अर्को अङ्ग्रेजी राष्ट्रिय दैनिक दि काठमाडौँ पोष्टमा समाजवादी चिन्तक र दार्शनिक प्रदीप गिरीको ७४ वर्षमा निधन शिर्षकमा तस्बिरसहितको समाचार प्रकाशित भएको छ । पहिलो र दोस्रो पृष्ठमा प्रकाशित समाचारमा उनको राजनीतिक यात्रादेखि समाजवादी चिन्तनका बारेमा प्रकाश पार्नुको साथै उहाँको बारेमा सहकर्मी विभिन्न नेताहरुले व्यक्त गर्नुभएको संक्षिप्त विचारलाई स्थान दिएको छ । यसबाहेक राजधानी र मोफसलबाट प्रकाशित अन्य दैनिक पत्रिका तथा साप्ताहिक पत्रिकामा पनि नेता गिरीको निधनको समाचारलाई प्रमुखता दिइएको छ ।
विभिन्न अनलाइन पोर्टलहरुमा पनि नेता गिरीको निधनप्रति समाचार तथा विभिन्न व्यक्तित्वका विचार र उनले नै लेखेका लेखहरु प्रकाशित भएका छन् । हिजो राति उनको निधनको समाचारहरु पनि थुप्रै अनलाइनहरुले ‘ब्रेकिङ’को रुपमा दिएका थिए । कतिपय अनलाइनहरुले दिउँसै निधन भएको अपुष्ट समाचार पनि नदिएका होइनन् । तर धेरै अनलाइन, रेडियो टेलिभिजनदेखि पत्रपत्रिकाहरुमा अस्तिदेखि नै उनको स्वास्थ्य अवस्था गम्भीर भएको विषयलाई समाचारको रुपमा दिएका थिए ।
उनको निधनको समाचार पुष्टि हुनासाथ नेपाली कांग्रेसलगायत विभिन्न पार्टीका नेता, कार्यकर्ता दिवङ्गत नेताप्रति श्रद्धाञ्जली दिन मेडिसिटी अस्पताल तथा पार्टी कार्यालयमा राखिएको उनको पार्थिव शरीरमा श्रद्धाञ्जलि दिन नेता, कार्यकर्तादेखि ठूलो जनमानसको घुइँचो लागेको विषय पनि मुख्य समाचारको रुपमा प्रकाशित भएका छन् । केही अनलाइनले गिरीप्रति अन्तिम श्रद्धाञ्जलि व्यक्त गर्नेदेखि शव यात्राका तस्बिरहरुको फोटो फिचर प्रकाशित गरेका छन् ।
