झापा, दाङ र मकवानपुरमा अवैध लागूऔषधसहित प्रहरीले ४ जनालाई पक्राउ गरेको छ ।
झापाको भद्रपुर-५ मेचीपुलबाट १ ग्राम २२० मिलिग्राम ब्राउनसुगरसहित अर्जुनधारा सालबारीका २४ वर्षीय आकाश गिरी बुधबार साँझ पक्राउ परेका हुन् ।
दाङको तुलसीपुर-६ बाट २२० मिलिग्राम ब्राउनसुगरसहित अर्का व्यक्ति बुधबार राति पक्राउ परेका छन् । पक्राउ पर्नेमा बाँके कोहलपुर-५ घर भएका २९ वर्षीय मान बहादुर गन्दर्भ छन् । उनलाई ब्राउनसुगर बेच्ने सोही गाउँका ३० वर्षिय नविन विकलाई पनि प्रहरीले पक्राउ गरेको छ ।
उता मकवानपुरको भिमफेदी-२ भैंसेबाट २५६ केजी २८ ग्राम गाँजासहित स्थानीय ३५ वर्षीय प्रकाश लामा पनि पक्राउ परेका छन् । इलाका प्रहरी कार्यालय भिमफेदीबाट खटिएको प्रहरीले आईचर ट्रक जाँच गर्ने क्रममा उक्त परिमाणको लागूऔषध फेला पारी ट्रक चालक लामालाई पक्राउ गरेको हो ।
