काठमाडौं । टिभी रियालिटी शो ‘द भ्वाइस अफ किड्स नेपाल’मार्फत चर्चामा आएकी बालगायिका रुक्सना लिम्बूको नयाँ गीत तथा भिडियो सार्वजनिक भएको छ । रुक्सनाको ‘यरिक यरिक नोगेन’ बोलको गीतलाई आइतबार काठमाडौंमा एक समारोहबीच सार्वजनिक गरिएको हो ।
रुक्सनाको ‘यरिक यरिक नोगेन’ गीतको भिडियोलाई कार्यक्रमका प्रमुख अतिथि लोकप्रिय गायक राजेशपायल राईले सार्वजनिक गरेका थिए । सार्वजनिक गीतमा शब्द तथा संगीत महेश खड्काको रहेको छ ।
रुक्सनाकै अफिसियल युट्युब च्यानल ‘रुक्सना लिम्बू’मार्फत सार्वजनिक ‘यरिक यरिक नोगेन’ गीतको भिडियोमा रुक्सना लिम्बू र उनकी आमा रेखा लिम्बू लावतीले अभिनय गरेका छन् । साथै, भिडियोमा संगीतकार महेश खड्का, पुष्पाञ्जली तिलिङ, प्रिया र सरिताको पनि अभिनय रहेको छ । उनीहरुलाई अतिथि कलाकारका रुपमा प्रस्तुत गरिएको छ ।
सैलेन्द्र नाल्बोको निर्माण रहेको यस भिडियोलाई मिनाक्षी कोइरालाले निर्देशन गरेकी हुन् । भिडियोमा प्रशान्त मगरको कोरियोग्रफ, अर्जुन तिवारीको सिनेमाटोग्राफी र सुप्रिम पराजुलीको सम्पादन रहेको छ ।
यसअघि पनि गायिका रुक्सनाले महेश खड्काको संगीतमा ‘नोगेन’ बोलको गीत गाएका थिए । उक्त गीतले चर्चा बटुलेसँगै महेशकै शब्द तथा संगीतमा ‘यरिक यरिक नोगेन’ गाएकी हुन् ।
पछिल्लो समय रुक्सना स्टेज कार्यmक्रमहरुमा समेत व्यस्त गायिका मानिन्छिन् । उनले छोटो समयमै दुई दर्जनभन्दा बढी गीत गाइसकेकी छन् । हालसम्म आएका उनका गीतहरु श्रोता दर्शकले रुचाएका छन् ।
यस्तै, आफ्नो पछिल्लो गीत ‘यरिक यरिक नोगेन’बाट पनि दर्शकको माया पाउनेमा उनी ढुक्कछिन् । कार्यक्रममा अतिथिहरुलाई स्वागत गर्दै रुक्सनाले भनिन्, ‘मलाई यसरी नै सधै माया गरि दिनुहोला । म तपाइँहरुकै मायाले अहिले यो ठाउँमा छु, यरिक यरिक नोगेन ।
