तेलंगाना । भारत तेलंगानाको सिकन्दराबादमा विद्युतीय स्कुटरको शोरुममा आगलागी हुँदा ६ जनाको मृत्यु भएको छ ।
१३ जना घाइते भएका छन् । भवनबाट हाम फालेर भाग्ने क्रममा उनीहरू घाइते भएका हुन् । भुईं फ्लोरमा रहेको विद्युतीय स्कुटर शोरुममा आगलागी भएको हो ।
हैदरावादका प्रहरी आयुक्त सीभी आनन्दले आगलागीबाट निस्किएको धुवाँले माथि रहेको होटलको पहिलो र दोस्रो तलामा भएका मानिस प्रभावित बनेको बताए । आगलागीको कारण भने खुल्न नसकेको उनले बताए ।
घटनाको समयमा होटलमा २३ जना थिए । तीमध्ये अधिकांश व्यवसायी छन् । मृत्यु हुने ६ जनामध्ये एक महिला छन् । कतिपयले आफ्नो ज्यान जोगाउन होटलबाट हाम फालेका थिए ।
अहिले स्थिति नियन्त्रणमा रहेको उनले बताए । दुर्घटनाप्रति दुःख व्यक्त गर्दै भारतीय प्रधानमन्त्री मोदीले मृतकलाई २ लाख क्षतिपूर्ति दिने घोषणा गरेका छन् ।
