काठमाडौं । बैंकर तथा गायक गोविन्द गुरुङको नयाँ गीतको भिडियो सार्वजनिक भएको छ । सार्वजनिक ‘मनको भारी’ बोलको गीतमा आमाप्रतिको माया र स्नेहतालाई दर्साइएको छ । उक्त गीतको संगीत लोकप्रिय संगीतकार हरि लम्सालले भरेका छन् भने एरेन्ज रिकेश गुरुङको रहेको छ ।
भिडियोमा लोकप्रिय कलाकारहरु लक्ष्मी बर्देवा र जीवन भट्टराई र कविता आलेले अभिनय गरेका छन् । भिडियोमा कलाकारहरुको जिवन्त अभिनय दख्न सकिन्छ । लक्ष्मी बर्देवा र जीवन भट्टराईको निर्देशन रहेको भिडियोमा बुद्ध थापाको सिनेमाटोग्राफी र बिष्णु खड्काको सम्पादन रहेको छ ।
०४८ सालमा रेडियो नेपालबाट स्वर परीक्षामा उत्तीर्ण गरेपछि औपचारिक गायन लागेका गुरुङ सफल बैंकरमा गनिन्छन् । बैंकर भएपछि पनि उनी गीतसंगीतमा निरन्तर छाउँदै आएका छन् ।
हाल म्यानमार सिटिजन बैंक, यांगुनको सिईओ रहेका गायक गुरुङको यसअघि दर्जनौँ गीतहरु लोक, आधुनिक र चलचित्रका गीतहरु आइसकेका छन् । उनको यो पछिल्लो गीत ‘मनको भारी’लाई पनि दर्शक तथा श्रोताले रुचाएका छन् ।
भिडियो सार्वजनिक गरिएको ४८ घण्टामै युट्युबमा २६ हजारभन्दा बढीले हेरिसकेका छन् । यससँगै गीतको लोकप्रियता बटुलिरहेको छ । यस गीतको भिडियोलाई टुवेल नोट नामम युट्युब च्यानलमार्फत सार्वजनिक गरिएको हो ।
