काठमाडौं । ललितपुरको ग्वार्कोमा पैदलयात्रीलाई ठक्कर दिएर फरार भएको गाडी र चालकलाई प्रहरीले नियन्त्रणमा लिएको छ ।
कात्तिक १२ गते बेलुका ग्वार्कोमा बाटो काट्दै गरेकी एक युवतीलाई ठक्कर दिएर फरार भएको गाडी र चालकलाई प्रहरीले १ सातापछि शनिबार नियन्त्रणमा लिएको हो ।
गाडी र त्यसका चालक प्युठानको प्युठान नगरपालिका–२ का ४७ वर्षीय वीरबहादुर राउतलाई नियन्त्रणमा लिएको परिसर ललितपुरका प्रवक्ता तथा एसपी सुधीरराज शाहीले जानकारी दिए ।
गाडीको ठक्करबाट गम्भीर घाइते भएकी अन्दाजी २० वर्षीया युवतीलाई तत्काल उपचारका लागि अस्पताल पठाइएपनि उनको उपचारकै क्रममा मृत्यु भएको थियो ।
गाडीको ठक्करबाट मुत्यु भएकी उनको अहिलेसम्म पहिचान खुल्न सकेको छैन । गाडीसहित पक्राउ परेका चालकलाई सवारी ज्यानको कसुरमा म्याद लिएर अनुसन्धान अघि बढाइएको प्रहरीले जनाएको छ ।
