काठमाडौं, ७ कातिक । नेपाली गीत संगीतमा फरक स्वाद पस्कँदै आएका गायक अंकितबाबु अधिकारीले नयाँ गीत ‘रफ्तार रफ्तार’ लिएर आएका छन् । पृथकशैली, शब्दचयन र दृश्य भाषाका माध्यमबाट कलात्मक ढंगले भिडियोमा स्टोरी टेलिङको प्रयोग रुचाउने अधिकारीका ‘राम नाम’, ‘सम्झनालाई’ बोलका गीत श्रोतामाझ लोकप्रिय छन् ।
‘रफ्तार रफ्तार’ बोलको गीतमा गायक अधिकारीलाई चिहानमा गीत गाउँदै गरेको देख्न सकिन्छ । चिहानमा जाँदा सबैको मन दुखित हुन्छ नै, तर उनले दुखित मुडलाई बदल्दै चिहानमा बिश्राम लिँदै गरेका आत्माहरुलाई खुशी बनाउन गीत सुनाउँछ्न । उनको गीत सुनेर अन्त्यमा चिहानबाट मरेकाहरुले ताली बजाउँदै आनन्द र खुशी प्रकट गरेको आवाज सुन्न सकिन्छ ।
‘रफ्तार’ बोलको यस प्रयोगात्मक गीतमा स्वर र संगीत गायक अंकितबाबु अधिकारीकै रहेको छ । गीतका शब्द अन्वेष राई थुलुङले लेखेका हुन् । गीतको संगीत संयोजन शार्दूल श्रेष्ठले गरेका हुन् ।
गीतको भिडियोलाई विकेश बज्रले खिचेका हुन् भने सुनिल पौडेलले सम्पादन गरेका हुन् । नेपाली गीतसंगीत क्षेत्रमा आवाज, प्रस्तुति, निर्माण पक्षबाट नयाँ आयाम र उचाई प्रदान गर्दै अघि बढिरहेको आर्टमाण्डुको निर्माणमा भिडियो तयार भएको हो ।
