काठमाडौैं । काठमाडौंको ठमेलमा युगान्डाका युवतीहरुको वेश्यावृत्ति गर्ने समूह रहेको खुलेको छ । एक युवतीलाई प्रहरीले पक्राउ गरेको छ ।
पर्यटक भिसामा नेपाल आई ठमेलस्थित होटलमा बस्दै आएकी युगाण्डाकी महिलालाई वेश्यावृत्तीमा लगाएको अभियोगमा काठमाडौं महानगरपालिका–२९ ठमेलस्थित होटेल जर्नी होममा बस्ने युगाण्डा मासाका घर भएकी २५ वर्षीया इमाक्युलेट नाबासुबालाई सोमबार प्रहरीले पक्राउ गरेको हो ।
उनले नेपालमा क्लीनर, वेट्रेस लगायतको काममा मासिक ५ सय अमेरिकी डलर कमाई हुने तथा नेपाल आउने जाने हवाई टिकट, भिषालगायतको खर्च समेत कमाएर तिर्ने शर्तमा एक युवतीलाई नेपालमा बोलाई वेश्यावृत्तिमा लगाएकी थिइन् । विभिन्न व्यक्तिसँग शारीरिक सम्पर्क गर्नुपर्ने, नत्र निज र पीडितको परिवारलाई मारीदिने सम्मको धम्की दिँदै शारीरिक सम्पर्क गर्न बाध्य पारेको, पीडित महिला बिरामी भई काम गर्न नसक्ने अवस्था भएपछि होटलबाट निकालेको र युगाण्डा फर्कन लागेकी पीडितलाई टिकट रद्द गरेकी थिइन् । त्यसपछि ती युवती प्रहरीमा पुगेकी हुन् ।
मानव बेचबिखन अनुसन्धान व्यूरो बबरमहलबाट खटिएको प्रहरीले उनलाई पक्राउ गरेको हो । अभियुक्त आफै यौन व्यवसायमा संलग्न हुँदै आएको, पीडित लगायत अन्य युगाण्डाका महिलाहरुलाई समेत नेपाल झिकाई यौन कार्यमा लगाउने गरेको, ठमेलका बिभिन्न नाईट क्लवहरुमा गई ग्राहकहरु खोजी ल्याउने र पीडितलाई बेश्यावृत्तिमा लगाई ग्राहकबाट प्राप्त रकम समेत आफैले लिने गरेको अनुसन्धानबाट खुल्न आएको ब्यूरोका एसपी कृष्ण पंगेनीले बताए । ठमेलमा युगान्डाका युवतीहरुको ५–६ जनाकै गिरोह देखिएको प्रहरीले जनाएको छ ।
