गुल्मी, १५ कात्तिक ।
आउँदो मंसिर १४ गते हुने उपचुनावमा नेपाल कम्युनिष्ट पार्टीले उम्मेदवारको टुंगो लगाएको छ ।
गुल्मीको रुरु गाउँपालिका– ६ को रिमुवामा अध्यक्ष पदका लागि नेकपाले गिरी सिञ्जालीको नाम सर्वसम्मत चयन गरेको नेकपा गुल्मीका सचिव वीरबहादुर कार्कीले जानकारी दिए । सिञ्जाली त्यही वडाका वडा सदस्य हुन् । उनलाई वडा सदस्य पदबाट राजीनामा गराइ वडाध्यक्ष पदमा उम्मेदवार बनाउन लागिएको छ ।
नेपाली काङ्ग्रेसले भने अझै उम्मेदवारको टुङ्गो लगाएको छैन । पार्टीका जिल्ला सभापति भुवनप्रसाद श्रेष्ठले अबको केही दिनमै उम्मेदवारको नाम सर्वसम्मतरूपमा चयन गरिने बताए ।
तर पहिलेकै उम्मेदवारको नाम चयन गर्ने सम्भावना रहेको उनको भनाई छ । रुरु गाउँपालिकामा पालिकाहरुको निर्वाचनमा काङ्ग्रेस र पूर्वमाओवादी केन्द्रको तालमेल रहेको थियो । पूर्वएमालेले गाउँपालिका अध्यक्ष, उपाध्यक्षसहित वडा नं ६ मा पनि जित हासिल गरेको थियो ।
वडा नं ६ का वडाध्यक्ष पूर्णबहादुर रेग्मीको २०७५ साल साउन १३ गते निधन भएको थियो । उनले ६२८ मत ल्याएका थिए भने भने प्रतिद्वन्द्वी नेपाली काङ्ग्रेसका वेदबहादुर दर्लामीले ६१९ मत ल्याएका थिए ।
२०७४ सालको प्रतिनिधि तथा प्रदेश सभा सदस्यको निर्वाचनअनुसार ६ नम्बर वडामा जम्मा एक हजार नौ सय ६७ जना मतदाता रहेको जिल्ला निर्वाचन कार्यालयका प्रमुख राजेन्द्रप्रसाद पोखरेलले जानकारी दिए ।
गुल्मीदरबार गाउँपालिका ७ का वडा सदस्य थम्मनबहादुर बस्नेतको पनि २०७४ साल भदौ २६ गते निधन भएको थियो । तर वडाध्यक्ष, पालिकाको उपाध्यक्ष, अध्यक्ष, प्रदेश र प्रतिनिधि सभा सदस्यबाहेक अन्य सदस्यहरुको हकमा पुनः निर्वाचन हुने व्यवस्था छैन ।
