काठमाडौँ, १५ कात्तिक । सन् २०२१–२२ का लागि रोटरी इन्टरनेशनलका प्रस्तावित अध्यक्ष शेखर मेहता काठमाडौँ आउनुभएको छ । मेहताको आज बेलुकी हायात होटलमा भव्य स्वागत गरिँदैछ । रोटरी डिष्ट्रिक 3292 ले प्रमुख अतिथि मेहताको स्वागतमा भव्य कार्यक्रम आयोजना गर्न लागेको हो । आज बेलुकी हायात होटल बौद्धको मुख्यद्वारबाट होटलसम्म मेहता दम्पतीलाई बग्गीमा राखेर अभिनन्दन गर्ने कार्यक्रम रहेको छ ।
काठमाडौँ भ्रमणमा एक दिनका लागि आउनुभएका मेहताले आज आयोजित पत्रकार सम्मेलनमा चौध वर्षमुनिका मुटुरोगीलाई भारतमा निःशुल्क उपचार गरिने घोषणा गर्नुभयो । भारतमा पनि चौध वर्षमुनिका दुई हजारभन्दा बढी बालबालिकालाई रोटरीको सहयोगमा उपचार गरिएको जानकारी दिँदै नेपालका विपन्न गरिब बालबालिकाको मुटुरोग उपचार पनि रोटरी क्लबले गर्ने जानकारी दिनुभयो ।
