अर्घाखाँची । प्रहरी महानिरीक्षक बसन्त बहादुर कुँवरले अचुचित लाभबाट टाढा बसी शून्य सहनशिलताको नीति लिन निर्देशन दिएका छन् । गृहजिल्ला अर्घाखाँचीमा आइपुगेका उनले शान्ति सुरक्षा कायम गर्न, अपराध अनुसन्धान तथा नियन्त्रणको साथै नागरिकमैत्री प्रहरी सेवालाई पहिलो प्राथमिकतामा राखेर सम्पूर्ण प्रहरी कर्मचारीहरूले आ–आफ्नो जिम्मेवारी वहन गर्नुपर्ने बताए ।
निर्देशनको क्रममा प्रहरी महानिरीक्षक कुँवरले समाजमा शान्ति सुरक्षा कायम गर्न एवम् अपराध अनुसन्धान तथा नियन्त्रणको लागि सरोकारवाला निकायहरूसँग आवश्यक समन्वय र सहकार्य गर्दै प्रभावकारी कार्यसम्पादन गर्नुपर्ने बताएका छन् । प्रहरी कर्मचारीको काम कर्तव्य, जिम्मेवारी, अधिकार एवम् प्रहरी कर्मचारीहरूले पालना गर्नुपर्ने आचरण तथा व्यवहारमा सुधार ल्याई संगठनको हित र विकासलाई सदैव प्राथमिकतामा राखी कार्य सम्पादन गर्नुपर्नेमा उनको जोड छ ।
प्रहरी काम कारवाहीमा मानव अधिकारको संरक्षण तथा सम्वर्ध्खन गर्दै उच्च मनोबलका साथ कार्यसम्पादन गर्नुपर्ने चर्चा गर्दै प्रहरी महानिरीक्षक कुँवरले अनुचित लाभमा शून्य सहनशिलता नीतिलाई अबलम्बन गर्न उपस्थित प्रहरी कर्मचारीहरुलाई निर्देशन दिएका छन् ।
गृहजिल्लामा प्रहरी महानिरीक्षक कुँवरले जिल्ला समन्वय समितिका प्रमुख, सन्धिखर्क नगरपालिकाका प्रमुख, अर्घाखाँची जिल्लाका प्रमुख जिल्ला अधिकारी, पूर्व उपसभामुख पुष्पा भुसाल, जिल्लास्थित राजनीतिक दलका प्रमुखहरु, नेपाल पत्रकार महासंघका अध्यक्ष तथा जिल्लामा क्रियाशील संचारकर्मीहरु, उद्योग वाणिज्य संघका अध्यक्ष, चेम्बर अफ कमर्शका अध्यक्ष र स्थानीय बुद्धिजिवी लगायतहरुसँग जिल्लाको शान्ति सुरक्षा तथा समसामयिक विषयमा शुक्रबार छलफल तथा अन्तरक्रिया समेत गरेका छन् ।
