न्यूरोडमा खुकुरी प्रहार गरी दाइको हत्या, भाइ पक्राउ

काठमाडौं – काठमाडौं न्यूरोडमा खुकुरी प्रहार गरी एक जनाको हत्या भएको छ ।

काठमाडौं महानगरपालिका- २३ का २५ वर्षीय सुरज शाक्यले गएराती आफ्नै दाइ ४५ वर्षीय सूर्य शाक्यको धारिलो हतियार प्रहार गरी हत्या गरेका हुन् ।

मदिरा सेवन गरी घर आएका दाइ सूर्यले आमालाई गालीगलौज गर्न थालेपछि भाइ सुरज शाक्यले धारिलो हतियार प्रहार गरी रातको करिब १२ बजे दाइको हत्या गरेको प्रहरी वृत्त जनसेवाका डीएसपी भेषराज रिजालले जानकारी दिए ।

हत्यापछि फरार भएका भाइ सुरजलाई प्रहरीले बाङ्गेमुढाबाट नियन्त्रणमा लिएको छ । घटना सम्बन्धमा थप अनुसन्धान भइरहेको प्रहरीले जनाएको छ ।