काठमाडौं, ११ फागुन । रोटरी क्लबमा निरन्तर २५ वर्ष सेवा गरेका रोटरी क्लबका ७० जना सदस्यलाई ज्येष्ठ नागरिक तथा संस्कृतिविद् सत्यमोहन जोशीले आइतबार बिहान पाटन दरबार स्क्वायरमा सम्मान गर्नुभयो ।
उक्त कार्यक्रममा सम्मानित हुनेहरुमा गोपाल कक्षपति, मणिध्वज जोशी, अजय स्थापित, डा. ओमकृष्ण मल्ल, योगेन्द्रमान प्रधान, सञ्जय गिरी, रतन केडिया, विलियम माँ, प्रचण्डलाल श्रेष्ठ, महेन्द्रलाल प्रधान, जीवन पियाँ, केएल भूषण र रुपकिशोर लाकौललगायतका रोटरियनहरु हुनुहुन्थ्यो ।
डिष्ट्रिक गभर्नर किरणलाल श्रेष्ठको अध्यक्षतामा सम्पन्न उक्त समारोहमा संस्कृतविद् जोशीलाई सम्मान गरिएको थियो । नेपालमा रोटरीका प्रवद्र्धक स्व. गोपालराज राजभण्डारीको योगदानका कारण रोटरी अभियान सफल भएको प्रमुख अतिथि जोशीले बताउनुभयो । उहाँले सबै धर्मको एउटै सार ‘सर्भिस अभोभ सेल्फ’ हो भन्ने धारणा राख्नुभयो । बुद्धको शान्तिको मार्ग पनि यही नै थियो भन्ने कुरालाई जोशीले थप व्याख्या गर्नुभयो । एशियामा रोटरी क्लबको स्थापना भएको सय वर्ष पुगेको छ । त्यसैबाट प्रेरणा लिएर स्व. गोपालराज राजभण्डारीले ६५ वर्ष अगाडि नेपालमा रोटरी स्थापना गर्नुभएको थियो ।
