एजेन्सी । इतिहासमै पहिलो पटक मानव मष्तिष्कमा चीप हालिएको छ । टेस्ला र ट्वीटरका मालिक एलन मस्कको न्यूरालिंक कम्पनीले इतिहासमै पहिलो पटक मानव मस्तिष्कमा ब्रेन चिप प्रत्यारोपण गरेको हो । मानव मस्तिष्कमा चिप जडान गरेसँगै मस्क फेरी एकपटक आफ्नो नयाँ कम्पनी न्यूरालिङ्कको साथ चर्चामा छाएका छन् ।
उनको स्टार्टअप ‘न्यूरोलिङ्क’ ले पहिलो मानव बिरामीमा मस्तिष्क प्रत्यारोपण गरेको हो । एलन मस्कले मंगलबार यो जानकारी दिएका हुन् । उनले भनेका छन् ‘न्यूरालिंक स्टार्टअपले आफ्नो पहिलो मानव बिरामीमा मस्तिष्क प्रत्यारोपण गरेको छ । पहिलो पटक मानवमा न्यूरालिंकबाट गरिएको चिप प्रत्यारोपणले सफलता प्राप्त गरेको छ । मस्कले ट्विट गर्दै अगाडी लेखेका छन, ‘प्रारम्भिक परिणामहरू आशाजनक छन ।’
सन् २०१६ मा मस्कले स्थापना गरेको न्यूरो टेक्नोलोजी कम्पनीले मस्तिष्क र कम्प्युटरबीच प्रत्यक्ष सञ्चार च्यानल सिर्जना गर्ने लक्ष्य राख्ने घोषणा गरेका थिए । न्यूरालिंकको टेक्नोलोजीले मुख्य रूपमा ‘लिंक’ नामक इम्प्लान्टमार्फत काम गर्नेछ । पाँच सिक्काको साइजको यन्त्र जसलाई शल्यक्रियामार्फत मानव मस्तिष्कमा राखिने छ र त्यसले काम गर्न सुरु गर्नेछ ।
कम्पनीले गत वर्ष जारी गरेको विज्ञप्तिमा मानिसमा मस्तिष्क प्रत्यारोपण परीक्षण गर्न अमेरिकी नियामकहरूबाट स्वीकृति प्राप्त गरेको जानकारी दिइएको थियो । यूएस फूड एन्ड ड्रग एडमिनिस्ट्रेशन (एफडीए) ले यसलाई मानवमा क्लिनिकल परीक्षणको लागि हरियो संकेत दिएको छ ।
