काठमाडौं । प्रधानमन्त्री पुष्पकमल दाहाल ‘प्रचण्ड’ले सत्तारुढ दलको बैठक बोलाउने तयारी गरेका छन् । नेपाली कांग्रेसको संसद् अवरोधका कारण राष्ट्रपतिलाई धन्यवाद दिने प्रस्ताव समेत सांसदबाट पारित नभएपछि बुधबार सभामुख देवराज घिमिरेले प्रधानमन्त्री प्रचण्डको ध्यानाकर्षण गराएका छन् ।
सभामुखसँगको भेटमा प्रधानमन्त्रीले बैठक बोलाएर सहमति खोज्ने बताएका छन् । प्रधानमन्त्री प्रचण्डले आजै बेलुकासम्म सत्तापक्षका नेताहरूको बैठक बोलाएर बिहीबार बस्ने संसद् बैठक खुलाउने गरी निर्णयमा पुग्ने बताएका हुन् ।
![](https://www.drishtinews.com/wp-content/uploads/2024/05/Prachada-Devraj.jpg)
त्यसक्रममा सभामुख घिमिरेले सांसदबाट विधेयकहरू पारित हुन नसकिरहेका बेला भइरहेको निरन्तरको अवरोधले जनस्तरमा वितृष्णा फैलिएको भन्दै चिन्ता व्यक्त गरेका छन् ।
संसद् सुचारु भए केही विधेयकहरू तत्कालै पारित गर्न सकिने अवस्थामा रहेको र केही विधेयकलाई समितिमा पठाउन सकिने सभामुख घिमिरेको भनाइ छ । प्रधानमन्त्रीको सचिवालयले आन्तरिक छलफल भइरहेकाले बेलुकासम्म सत्तारुढ दलको बैठक बस्न सक्ने सम्भावना रहेको जनाएको छ ।