काठमाडौं । नेकपा एकीकृत समाजवादीका महासचिव घनश्याम भुसालले नेकपा माओवादी केन्द्रलाई नेकपा एमाले र नेपाली कांग्रेसले घुस खान सिकाएको आरोप लगाएका छन् ।
शनिबार डा.मुक्ति रिजालद्वारा लिखित ‘बाबुराम : अ भिजनरी रिबेल’ नामक पुस्तक विमोचन कार्यक्रममा बोल्दै महासचिव भुसालले कांग्रेसले राजाबाट, एमालेले कांग्रेसबाट र माओवादीले कांग्रेस एमाले दुवैबाट घुस खान सिकेको आरोप लगाएका हुन् ।
महासचिव भुसालले भने, “राजाले परम्परा र अन्तबाट पनि सिके होलान् । कांग्रेसले राजाबाट सिक्यो भन्ने लाग्छ । एमाले भएर कांग्रेसबाट सिक्यौं । उनीहरूसँग संगत बढ्दै जाँदा हामीले सिक्यौं । माओवादीलाई हामी दुइवटै मिलेर घुस खान सिकाएका हौं भन्ने लाग्छ । हामी आफूजस्तै बनायौं ।”
उनले शान्ति प्रक्रियापछि बाटो नदेखेपछि माओवादीले समाजको कुरा बिर्सिएको बताए । महासचिव भुसालले त्यतिबेला जनवादी क्रान्ति सम्पन्न भएको घोषणा गर्दै समाजवादी क्रान्तिमा जाने र त्यसका योजना सार्वजनिक नगर्नु माओवादी र डा. भट्टराईको गल्ती रहेको बताए ।
महासचिव भुसालले कांग्रेस र एमाले दुई दलको सरकारसँग मुलुकमा रोजगारी र कृषिमा क्रान्ति गर्नसक्ने क्षमता भएपनि त्यो नहुने भन्दै भने, “क्षमता भएपनि अहिलेको सरकारले के गर्ला भन्दा इतिहासमा आफैंले गरेका अपराधहरू लुकाउन यसलाई अप्ठ्यारो हुनेछ। त्यसका नेताहरूलाई अप्ठ्यारो हुनेछ ।”
