काठमाडौं । बागमती प्रदेशका मुख्यमन्त्री बहादुर सिंह लामाले आज विश्वासको मत लिँदैछन् ।
एमाले–कांग्रेसको गठबन्धनबाट साउन ८ मा मुख्यमन्त्री नियुक्त भएका लामाले ३० दिन भित्र सांसदबाट विश्वासको मत लिइसक्नुपर्ने संवैधानिक व्यवस्था रहेको छ ।
नेपालको संविधानको धारा १६८ को उपधारा (४) तथा प्रदेश सभा नियमावली २०७४ को नियम १४३ को उपनियम (१) बमोजिम लामाले सांसदबाट विश्वासको मत लिन लागेका हुन् ।
मुख्यमन्त्रीेले विश्वासको मत लिने प्रयोजनका लागि सभामुख भुवनकुमार पाठकले प्रदेशसभाको बैठक दिउँसो ३ बजेलाई बोलाएका छन् । मुख्यमन्त्री लामालाई एमालेका २७ र कांग्रेसका ३७ सांसद गरी ६४ जनाको समर्थन रहेको छ ।
१ सय १० सदस्यीय प्रदेश सभामा बहुमत सरकारका लागि ५६ सांसदको बहुमत समर्थन आवश्यक हुन्छ । प्रदेश सभामा विपक्षी दल माओवादी केन्द्रको २१, राप्रपाको १२ (सभामुख बाहेक), नेकपा (एकीकृत समाजवादी) को ७, नेमकिपाको ३ र हाम्रो नेपाली पार्टीको २ सांसद छन् ।
