महिला फुटबल टोलीसँग प्रधानमन्त्रीको भेट

काठमाडौं । प्रधानमन्त्री केपी शर्मा ओलीले नेपाली महिला राष्ट्रिय फुटबल टोलीका खेलाडीहरूसँग भेट गरेका छन् ।

बिहीबार सरकारी निवास बालुवाटारमा बोलाएर प्रधानमन्त्री ओलीले खेलाडीहरुसँग भेट गरेका हुन् । उनले सामाजिक सञ्जालमार्फत खेलाडीहरुसँग भेट भएको तस्वीरसहित जानकारी दिएका हुन् ।

भेटघाटको तस्बिर सार्वजनिक गर्दै प्रधानमन्त्री ओली फेसबुकमा लेखेका छन्, ‘लक्ष्मीपूजाको दिन, नेपाली फुटबलका लक्ष्मीहरूसँग।’

बुधबार साँझ भएको साफ महिला च्याम्पिनयसिपको फाइनलमा बंगलादेशसँग नेपाल २–१ गोलले पराजित हुँदै उपविजेतामा सीमित भएको थियो । उक्त खेल हेर्न प्रधानमन्त्री ओली पनि दशरथ रंगशाला पुगेका थिए ।