काठमाडौं । धरानकी मोडल तथा अभिनेत्री रेखा लिम्बू पुर्वेली गीतको भिडियोमा देखिएकी छन् । चर्चित युवा निर्देशक युगल पोमूको निर्देशन रहेको ‘बाटो खुल्यो पूर्वको’ बोल गीतको भिडियोमा रेखाको छमछमी नृत्य देख्न सकिन्छ ।
सन्देश बम्जनको स्वर रहेको यस गीतमा शब्द बिकल्प बम्जन र संगीत ईन्द्र आर.पीको रहेको छ । ‘नेपाल स्टार’को रनरअप एवं ‘नेपाल सिंगिङ स्टार’को फाइनालिस्ट समेत रहेको सन्देश मोडल पनि हुन् । यस गीतको भिडियोमा रेखासँग सन्देशले अभिनय तथा अनस्क्रिन रोमान्स गरेका छन् ।
यस भिडियोमा केही नेपाली फिल्महरुमा समेत अभिनय गरिसकेकी रेखा र सन्देशको केमेष्ट्रि जमेको छ । प्रायः मोर्डन गीतमा मोडलिङ गर्दै आएकी रेखालाई यस भिडियोका लागि म्युजिक भिडियो निर्देशक युगलले नचाउन सफल भएका छन् । युगल निर्देशित पुर्वेली लोकगीतहरु चर्चित छन् । ‘सिँगौरी’ जस्ता चर्चित पुर्वेली गीतको भिडियो निर्देशन गरेका युगल ‘बाटो खुल्यो पूर्वको’ यस गीतको भिडियोलाई पनि दम्दार बनाउने प्रयत्न गरेका छन् ।
सन्देश र रेखालाई नचाउनका लागि कोरियोग्राफरद्वय सुरेश राई र रविन धामीले पनि मिहिनेत गरेका छन् । सुमन तामाङको सिनेमाटोग्राफी रहेको यस भिडियोलाई अनिलकुमार महर्जनले सम्पादन गरेका हुन् । पशुपति तामाङ र आशा तामाङको निर्माण रहेको यस भिडियोलाई आजै युट्युबमार्फत सार्वजनिक गरिएको हो ।
