काठमाडौं । बीवाईडी एम६ को बुकिङ खुला भएको छ । नेपालका लागि बीवाईडीको आधिकारिक वितरक साइमेक्स इंकले बीवाईडी एम६ को बुकिङ खुला गरेकाे जनाएकाे हाे ।
कम्पनीका अनुसार याे गाडी बुकिङ गर्नेहरुले एक लाख ५० हजार रुपैयाँ छुट पाउनेछन् । नेपालकै पहिलो प्रिमियम ७ सिटर एमपीभी बीवाईडी एम६मा एक लाख ५० हजार रूपैयाँ छुट दिइने भएकाे हाे । छुटपछि याे गाडीकाे मूल्य ५५ लाख र ६० लाख १५ हजार रुपैयाँ हुनेछ । एक पटक गाडी चार्ज गर्दा बीवाईडी एम६ ४४० किलाेमिटर कुद्ने कम्पनीले दाबी गरेकाे छ । याे गाडीमा ५५.४ र ७१.८ किलोवाट आवर क्षमताका ब्याट्री हुनेछन् भने १०० किलोवाटको मोटर हुनेछ ।
बीवाईडी एम६ पनि इलेक्ट्रिक एमपीभी रहेकाे छ । तर, यसले अधिक ब्याट्री क्षमता र लामो दूरीको यात्रा प्रदान गर्ने कम्पनीले जनाएकाे छ। एम६मा विस्तृत स्थान र आधुनिक सुविधाहरू जस्तै क्रूज कन्ट्रोल, लेन-कीपिङ असिस्ट र इन्फोटेनमेन्ट सिस्टम जस्ता नयाँ प्रविधि समावेश छन्।
यस गाडीमा ड्रागन फेस डिजाइन, स्पिडी डाइनामिक ह्विल हब, क्रिस्टल डायमन्ड फ्लोटिङ एलईडी हेडल्याम्प, इलेक्ट्रिक एलिगेन्स, इलेक्ट्रिक स्लाइड सहितको प्यानोरामिक ग्लास, भेइकल टु लोड मोबाइल पावर स्टेसन लगायतका विभिन्न फिचर पाउन सकिनेछ ।
केही महिनाअघि, कम्पनीले राइट ह्यान्ड ड्राइभ भर्सनको एम६ उत्पादन गरेको थियाे । यो कारमा पनि बीवाईडीको अत्याधुनिक नयाँ प्रविधिको ब्लेड ब्याट्री दिइएको छ । याे विभिन्न ५ र ७ सिटका साथ आउने बहुउद्देश्यीय कार रहेकाे छ।
