काठमाडौं । नेपाल प्रिमियर लिग (एनपीएल) को एलिमिनेटर खेलमा कर्णाली याक्सले पहिले ब्याटिङ गर्ने भएको छ । कीर्तिपुरस्थित टियू क्रिकेट मैदानमा चितवन राइनोजले टस जितेर फिल्डिङ रोजेपछि कर्णालीले पहिले ब्याटिङ गर्ने भएको हो ।
यो खेलको विजेताले दोस्रो क्वालिफायरमा स्थान बनाउनेछ । पराजित टोली भने प्लेअफबाटै बाहिरिनेछ । यसअघि लिग चरणमा भएको भेटमा कर्णाली याक्सलाई चितवनले ९ विकेटले हराएको थियो । चितवन आजको खेलमा सोही नतिजा दोहो¥याउने योजना सहित मैदानमा हुनेछ । कर्णाली भने बदला लिँदै क्वालिफायर्समा स्थान बनाउने दाउमा हुनेछ ।
आजै दिउँसो १ बजे पहिलो क्वालिफायर्स खेल हुँदै छ । जसमा शीर्ष स्थानको सुदूरपश्चिम रोयल्स र दोस्रो स्थानको जनकपुर बोल्ट्स भिड्दै छन् । यसमा विजयी टोली सिधै फाइनलमा पुग्नेछ भने हार्ने टिमले फाइनल पुग्नका लागि अर्को एक मौका पाउनेछ ।
दोस्रो क्वालिफायर्समा पहिलो क्वालिफायर्समा पराजित टोली र एलिमिनेटरको विजेता टोली भिड्नेछन् । बिहीबार हुने यस खेलमा विजयी फाइनलमा प्रवेश गर्नेछ । फाइनल खेल शनिबार हुनेछ ।
