काठमाडौं । जनकपुरधाममा एक जना पुरुषको शव फेला परेको छ । जनकपुरधामको विद्यापती चोकदेखि नापी कार्यालय जाने बाटोमा रहेको दुर्गा मन्दिर परिसरमा शुक्रबार बिहानै एक जना पुरुषको शव फेला परेको हो ।
पहिचान खुल्न नसकेको अन्दाजी ५० वर्षीय पुरुषको शव फेला परेको जिल्ला प्रहरी कार्यालय धनुषाका प्रहरी प्रवक्ता तथा डिएसपी बरुणबहादुर सिंहले जानकारी दिए ।
प्रहरीका अनुसार मृतक पुरुषको टाउकोमा चोट लागेको देखिएको छ । छेउमा इँटा पनि फेला परेको छ । कसैले उनको टाउकोमा इँटा प्रहार गरी हत्या गरेको देखिन्छ । हत्यामा संलग्न व्यक्तिको खोजी भइरहेको प्रहरीले जनाएको छ ।
घटनास्थलमा तालिम प्राप्त कुकुरसहितको टोली परिचालन गरिएको र घटनासम्बन्धी अनुसन्धान भइरहेको धनुषा प्रहरीले जनाएको छ ।
