काठमाडौं । नेकपा एमालेका महासचिव शंकर पोख्रेलसहितका शीर्ष नेताहरू आज धनकुटा पुगेका छन् । एमालेले सञ्चालन गर्न लागेको ‘जरा’ केन्द्रित तीन महिने अभियानको जिल्लास्तरीय अभिमुखीकरण कार्यक्रमका लागि नेताहरू धनकुटा जान पुगेका हुन् ।
आजदेखि सुरु हुने अभियान कार्यक्रमलाई एमाले महासचिव पोख्रेलका अलावा स्थायी कमिटी सदस्य एवं कोशी प्रदेश इन्चार्ज शेरधन राई, स्थायी कमिटी सदस्य एवं कोशी प्रदेशका मुख्यमन्त्री हिक्मतकुमार कार्की, एमाले केन्द्रीय सदस्य एवं पूर्वमन्त्री राजेन्द्र राईलगायतले सम्बोधन गर्ने बताइएको छ ।
एमाले धनकुटाका प्रचार विभाग प्रमुख रविन कटेलका अनुसार कार्यक्रममा सहभागिताका लागि एमालेले पार्टीका नेता, कार्यकर्ता, समर्थक एवं शुभेच्छुकहरूलाई आग्रह गरिएको छ ।
एमालेले यो माघदेखि चैतसम्म तीन महिना वडा केन्द्रित अभियानमा जुटेको छ । निर्णायक राष्ट्रिय शक्ति निर्माणका लागि देशव्यापी रुपमा सञ्चालन गर्न लागिएको यो कार्यक्रमलाई जरा केन्द्रित अभियान नाम दिइएको छ ।
