काठमाडौं । चितवनमा प्रहरीले एक जना युवकमाथि निर्घात कुटपिट गरेका छन् । भरतपुर महानगरपालिकाको बाइपास सडकखण्डमा रातिका समय चेकिङमा खटिएका एक प्रहरीले ‘माथिको पावर देखाएको’ भन्दै युवकलाई कुटेका हुन् ।
उनले चेकिङका क्रममा ति युवकलाई लात्तीले हानेर लडाएर फेरि पनि लात्तैलात्ताले हानेको भिडियो सामाजिक सञ्जालमा भाइरल भइरहेको छ । भिडियोमा मोटरसाइकल चेकिङ गरिरहेका बेला प्रहरीले ‘फोन गर्ने ?’, ‘माथिको पावर देखाउने ?’ भन्दै एक युवकलाई कुटपिट गरेको देखिन्छ ।
प्रहरीबाट जोगिन ती युवक अलि पर भाग्न खोज्छन् । तर, प्रहरी पछि लाग्दै लात्तीले हानेर बिजुलीको पोल छेउमा लडाउँछन् । ती युवक लडिसकेपछि पनि उनले गाली गर्दै लात्ती प्रहार गरिरहेको देखिन्छ ।
जिल्ला प्रहरी कार्यालय चितवनका एसपी गौतम मिश्रले घटना छानबिनका लागि डीएसपी ज्ञानकुमार महतोको नेतृत्वमा तीन सदस्यीय छानबिन समिति गठन गरिएको जानकारी दिए । घटनाबारे आवश्यक अनुसन्धान गरेर गल्ती गर्नेहरूलाई नियम अनुसार कारबाही प्रक्रिया अगाडि बढाउने उनले बताए ।
