काठमाडौं । समाजवादी प्रेस संगठन नेपालको राष्ट्रिय भेला आउँदो फागुन ७ गते काठमाडौँमा हुने भएको छ । राष्ट्रिय भेलाको अघिल्लो दिन केन्द्रीय कमिटीको बैठक बस्ने भएको छ ।
सङ्गठनको पदाधिकारी बैठकले राष्ट्रिय भेला एवं केन्द्रीय कमिटीको बैठक गर्ने निर्णय गरेको बैठकमा सहभागी सङ्गठनका उपाध्यक्ष सुभाष साहले जनाएका छन् ।
बैठकले नेकपा एकीकृत समाजवादीको प्रचार विभाग प्रमुख एवं सङ्गठनका नयाँ तोकिएका इन्चार्ज उपाध्यक्ष प्रकाश ज्वालालाई स्वागत गर्दै निवर्तमान इन्चार्ज एवं प्रचार विभाग प्रमुख उपाध्यक्ष जगन्नाथ खतिवडालाई बिदाइ गरिएको छ ।
यसैगरी बैठकले सङ्गठनको जीवनमा गम्भीर आघात पुग्नेगरी अवाञ्छित क्रियाकलाप गर्ने अध्यक्ष विश्वमणि सुवेदी, विशेष अदालतबाट भ्रष्टाचार प्रमाणित भएका महासचिव रामकुमार एलन, सचिव नेपोलियन चेपाङ र कोषाध्यक्ष कृपा भण्डारीले सङ्गठनको हितविपरित कार्य गर्दै अर्को संगठनमा प्रवेश गरेपछि उनीहरूलाई समेत कारबाही गरिएको सङ्गठनका कार्यवाहक अध्यक्ष नवराज छत्कुलीले जारी गरेको विज्ञप्तिमा उल्लेख गरिएको छ ।
यसैगरी सङ्गठनको पर्सा जिल्लामा रहेको दुई वटा समानान्तर कमिटीलाई विघटन गरिएको छ । दुवै सङ्गठनलाई विघटन गर्दै पदाधिकारी बैठकले अजय चौरसियाको संयोजकत्वमा पाँच सदस्यीय तदर्थ कमिटी गठन गरिएको छ ।
कमिटीको सदस्यहरूमा आशमहम्द मियाँ, शम्भुकुमार सुमन, दीपेन्द्र गिरी र विनोद पटेल रहेका छन् । दुवै समानान्तर कमिटीका अध्यक्षद्धयलाई सदस्यमा राखिएको हो ।
