बाजुरा, ८ माघ । खप्तड छेडेदह गाउँपालिका–६सुदाडाबाट घरेलु हात हतियार सहित एक जनालाई प्रहरीले पक्राउ गरेको छ । पक्राउ पर्नेमा सोही गाउँपालिका सुदाडाका लालबहादुर सेजुवाल रहेको जिल्ला प्रहरी कार्यालय बाजुराका प्रहरी नायव उपरिक्षक मदनजीत महराले जानकारी दिएका छन् ।
उनले दिएको जानकारी अनुसार घर नजिकै रहेको भैसी गोठमा लुकाएर राखेका तीन वटा बन्दुक बरामद गरी सेजुवालाई मंगलबार पक्राउ गरी जिल्ला प्रहरी कार्यालयमा ल्याइएको बताए । पक्राउ परेका सेजुवाल संकास्पद व्यक्ति भएकाले नियन्त्रणमा लिएको प्रहरी प्रमुख महराले भने । हातहतियार (बन्दुक) लुकाएर राख्ने आउसे सेजुवाल र मान सेजुवाल भने फरार रहेको प्रहरी प्रमुख महराको भनाई छ ।
भैसी गोठमा बन्दुक लुकाएर राखेको गोप्य सूचनाका आधारमा जिल्ला प्रहरी कार्यालय बाजुराको टोली खोजतलास गर्दा बरामद गरेको प्रहरी प्रमखु महराले बताएका छन् । पक्राउ परेका सेजुवालले हातहतियार नभएको बयान दिएकाले कसको हो भन्ने बारेमा थप अनुसन्धान भइरहेको प्रहरी प्रमुख महराले भने ।
सोही ठाउँबाट जंगली जनावरको छाला समेत प्रहरीले बरामद गरेको जिल्ला प्रहरी कार्यालय बाजुराले जनाएको छ । बरामद गरिएको छाला कुन जंगली जनावरको हो भन्ने बारेमा पहिचान खुलेको छैन ।
