कलैया, २६ माघ । बाराको महागढीमाई नगरपालिका-१ की ४८ वर्षीया महिलाको घरभित्रै हत्या भएको छ । प्रहरीका अनुसार ४८ वर्षीया कान्तिदेवी कुशवाहको आइतबार राति हत्या भएको हो । कान्तिदेवीको गालामा धारिलो हतियार प्रहार भएको प्रहरीले जनाएको छ ।
डिएसपी गौतम मिश्रका अनुसार जनकपुरस्थित प्रादेशिक प्रहरी कार्यालयबाट विशेष तालिमप्राप्त कुकुर ल्याएर अनुसन्धान अघि बढाइएको छ । आइतबार बेलुकी उनका श्रीमान खाना खाएर घर बाहिर निस्किएका थिए ।
केहीबेरपछि आफू घरमा फर्किंदा श्रीमतीलाई मृत अवस्थामा फेला पारेको उनले प्रहरीलाई बताएका छन् । कुशवाह परिवारका तीन छोरा र एक छोरी भए पनि उनीहरु अध्ययनको सिलसिलामा जिल्ला बाहिर रहेको प्रहरीको भनाई छ ।
